Prezident Ukrainy Piatro Parašenka ŭvioŭ u dziejańnie rašeńnie Rady nacyjanalnaj biaśpieki i abarony Ukrainy ad 15 sakavika 2017 hoda «Ab prymianieńni piersanalnych śpiecyjalnych ekanamičnych i inšych abmiežavalnych mier (sankcyj)» u dačynieńni da šerahu jurydyčnych asob, paviedamlaje UP.
Sankcyi terminam na adzin hod buduć užytyja da PAT «Aščadbank, PAT «ViJes Bank», PAO «Akcyjanierny kamiercyjny pramysłova-inviestycyjny bank», PAO «VTB BANK», PAO «BM BANK» u častcy praduchileńnia vyvadu kapitałaŭ nazvanymi jurydyčnymi asobami za miežy Ukrainy na karyść źviazanych ź imi asob.
Jak adznačajecca ŭ adpaviednym ukazie, rašeńnie RNBA było pryniataje zhodna z artykułam 5 Zakona Ukrainy «Ab sankcyjach» i z ulikam prapanoŭ Nacyjanalnaha banka Ukrainy.
Kabiniet ministraŭ razam z Nacyjanalnym bankam Ukrainy pavinny zabiaśpiečyć realizacyju i manitorynh efiektyŭnaści sankcyj i nieadkładna pryniać miery adnosna zabarony raźmiaščeńnia srodkaŭ dziaržaŭnych pradpryjemstvaŭ, ustanoŭ, arhanizacyj i haspadarčych tavarystvaŭ, u statutnych kapitałach jakich jeść karparatyŭnyja pravy dziaržavy, u bankach, ukazanych u rašeńni RNBA.
Ministerstva zamiežnych spraŭ Ukrainy pavinna prainfarmavać kampietentnyja orhany Jeŭrapiejskaha Sajuza, Złučanych Štataŭ Amieryki i inšych dziaržaŭ ab uviadzieńni sankcyj i pastavić pierad imi pytańnie ab prymianieńni anałahičnych abmiežavalnych mier da adpaviednym jurydyčnym asobam.
Kantrol za vykanańniem rašeńnia ŭskładajecca na Sakratara RNBA Alaksandra Turčynava. Ukaz ustupaje ŭ siłu z dnia jaho apublikavańnia.
