Biznesoŭcy skardziacca, što za karystańnie histaryčnymi budynkami ź ich namahajucca spahnać dadatkovyja hrošy. Čynoŭniki adkazvajuć: usio pa zakonie.
16 sakavika prajšoŭ schod arandataraŭ, jakija zdymajuć pamiaškańni ŭ histaryčnym centry stalicy i supracoŭničajuć z KUP «Minskaja spadčyna». Na schodzie arandataram paviedamili, što im treba zapłacić 5% ad hadavoha prybytku pradpryjemstvaŭ za «ŭździejańnie» na histaryčny centr Minska ŭ adpaviednaści z ukazam prezidenta RB № 527 ad 2007 hoda.
«Pry hetym ni pra hetym ŭkazie, ni pra dziŭnych 5% ničoha da hetaha momantu nie było viadoma i nie ahučvałasia pry zaklučeńni dahavoraŭ i nijak u ich nie adlustravana. Ale pa «ščaślivaj vypadkovaści» mienavita ciapier pra «ŭździejańni» pryhadała Ministerstva kultury i Prakuratura», — śćviardžajuć biznesoŭcy.
Praŭda, varta pryznać — ukaz №527 papiaredžvaje pra spahnańnie 5% prybytku z arandataraŭ-biełarusaŭ (zamiežnyja jurasoby, naprykład, musiać spłacić uvohule 25%).
Ale ž čamu raniej pra heta maŭčali, a tut raptam uzhadali?
«Naša rola — aznajomić arandataraŭ z ukazam prezidenta №527. I ŭsio. Va ŭkazie ŭsio napisana. U minułym hodzie, ja tak razumieju, nie spłačvali. Čamu… Nie mahu vam patłumačyć. Kantraluje vykanańnie ŭkaza Ministerstva kultury. Čamu jany robiać štości takim ci inšym čynam — jany nam nie kažuć», — raspaviała «Našaj Nivie» Taćciana Viarchoła, načalnik adździeła arendnych znosinaŭ KUP «Minskaja spadčyna».
Va ŭpraŭleńni pa achovie historyka-kulturnaj spadčyny zajavy pradprymalnikaŭ abviarhajuć.
«Heta nie navina, što treba spłačvać 5%. I płaciać nie tolki sioleta — płacili i ŭ minułyja hady», — skazała Natalla Chvir, načalnica adździeła achovy historyka-kulturnaj spadčyny.
Pa słovach čynoŭnicy, hrošy, atrymanyja zhodna z ukazam №527, iduć na adnaŭleńnie historyka-kulturnych kaštoŭnaściej.
«Letaś hetyja hrošy vydatkoŭvalisia na Pustynki [Uśpienski manastyr pad Amścisłavam — NN], taksama išli hrošy na Połack», — dadała Chvir.
