Prapanovy pa ŭniasieńni źmianieńniaŭ u dekret № 3 majuć namier sfarmulavać da 1 krasavika, paviedamiŭ siońnia na pres-kanfierencyi namieśnik ministra pa padatkach i zborach Uładzimir Mukvič.
«Praca ciapier viadziecca», — skazaŭ Uładzimir Mukvič. Pavodle jaho słoŭ, nad prapanovami pa źmienie dakumienta pracujuć Minpracy i MPZ.
- Na padstavie hetych źmianieńniaŭ i budzie, mahčyma, skaročana kolkaść płacielščykaŭ i pryniaty miery, jakija rehulujuć paradak vypłaty hetaha zboru. Ciapier kazać pra toje, na kaho budzie ŭskładziena jaho administravańnie, nie varta. Ale pry hetym treba adznačyć, što padatkovyja orhany hatovyja praciahvać vykonvać svaje funkcyi pa administravańni hetaha zboru, - adznačyŭ namieśnik ministra.
Raniej deputat Ihar Marzaluk raspavioŭ, što 25 sakavika buduć padpisanyja papraŭki ŭ dekret №3.
Pavodle jaho słoŭ, deputaty Pałaty pradstaŭnikoŭ Nacschodu raspracavali papraŭki ŭ dekret. Jany prapanujuć pašyryć pieralik katehoryj tych, kaho vyzvalać ad zboru na finansavańnie dziaržaŭnych vydatkaŭ. Da darmajedaŭ nie buduć adnosić pryzyŭnikoŭ terminovaj i alternatyŭnaj vajskovaj słužby, žančyn, jakija znachodzilisia pad miedycynskim nahladam padčas ciažarnaści i rodaŭ, studentaŭ dzionnaj formy navučańnia ŭ hod pastupleńnia i zakančeńnia navučalnaj ustanovy, a taksama hramadzian, jakija znachodzilisia na psichanieŭrałahičnym dyspansiernym uliku.
Ad padatku, jak płanujecca, taksama vyzvalać tych, chto vałodaje ziamielnym učastkam niezaležna ad jaho metavaha pryznačeńnia i miescaznachodžańnia. Nahadajem, ciapier ad padatku na darmajedstva vyzvalajucca tolki žychary viosak i haradskich pasiołkaŭ, jakija vałodajuć ziamielnymi ŭčastkami dla viadzieńnia asabistaj padsobnaj haspadarki.
