Paśla publikacyi ŭ niezaležnych ŚMI infarmacyi pra toje, jak adzin z kiraŭnikoŭ BRSM Siarhiej Kliševič razam z AMAPam napaŭ na lidara «Maładoha frontu» Źmitra Daškieviča na adkryćci pomnika Leninu kala MTZ, sakratar jačejki BRSM u Biełdziaržuniviersitecie Kanstancin Andrusievič razasłaŭ svaim padapiečnym instrukcyi dla viadzieńnia «infarmacyjnaj vajny».

«Kali my nie budziem padtrymlivać svaich, to ŭ vyniku atrymajem źmienu paradkaŭ i naohuł taho, dzie my pracujem», — tłumačyć Andrusievič nieabchodnaść «zastupicca» za svajho kalehu, jaki abniasłaviŭsia kala pomnika Leninu.

«My nie prostaja studenckaja arhanizacyja, jakaja zajmajecca ala zabaŭkami studentaŭ. Kali nas paprasili (nie zahadali, choć mahli i zahadać) — my robim heta», — piša Andrusievič kiraŭnikam supołak na fakultetach BDU.

«Padklučycie svaich namieśnikaŭ, nie zrobim — hroš nam cana! Davajcie spracujem …(niecenzurnaje słova). Dziakuj, zajcy!», — zakančvaje jon svaju natchnionuju preambułu.

Dalej iduć kankretnyja instrukcyi, što treba rabić BRSMaŭskim trolam u siecivie. Zahad prosty: prakamientavać «jak śled» artykuł pra Kliševiča na sajtach charter97.org, «Naša Niva», «Biełaruski partyzan», «Salidarnaść», TUT.BY.

Ad kožnaha fakulteta patrabavalisia dva «dobryja kamientary» pad kožnym artykułam pra Kliševiča. Dedłajn — da 19.00 taho dnia, kali byŭ razasłany «zahad» «vojsku trolaŭ». Praduhledžvałasia i strohaja spravazdačnaść z ukazańniem vobłaści, sajta, nika i skrynšota staronki z kamientarom.

Kamientary tre było pisać pad čužymi imionami. Asnoŭnyja temy kamientaroŭ — «historyja adna dla ŭsich», «pravakacyi viaduć da destabilizacyi», «BRSM baronić intaresy ludziej» dy inšy niachitry nabor prapahandy.

Vidavočna, padnačalenyja drenna vykanali zahad svajho vierchavoda Andrusieviča, bo paźniej jon napisaŭ im: «Ja zrazumieŭ, što ad vas mała karyści. Pajdu pa 10 tysiač čałaviek šukać tych, chto zmoža heta zrabić, kali našy lidary BRSM fakultetaŭ nie mohuć».

Sajt charter97.org paviedamlaje, što ŭ kamientary Kanstancin Andrusievič zajaviŭ, maŭlaŭ, nijakich instrukcyj nie było i razmaŭlać na hetuju temu jon nie budzie, i kinuŭ słuchaŭku.

Клас
0
Панылы сорам
0
Ха-ха
0
Ого
0
Сумна
0
Абуральна
0