Pasaž Jurja Azaronka, jakoha vypierli z BT, pra toje, što jon a) usio adno zastaniecca čałaviekam prezydenta i b) usio adno praciahnie zdymać filmy, nia moža nia radavać. U krainie źjaviŭsia novy napramak niezaležnaha kino.

Viadoŭca: Vitajem vas u studyi francuskaha kanała Arte. Siońnia ŭ nas u haściach metry avanhardnaha kino — Łars fon Tryjer i Žan Luk Hadar. Tema našaj razmovy — fenomen niekamercyjnaha małabiudžetnaha kino ŭ Biełarusi, pradstaŭlenaha tvorčaściu vialikaha režysiora Azaronka. Adnak spačatku — zašybiennaja navina. Tolki, što vyjšaŭ dekret prezydenta RB ab pahłybleńni baraćby za ekanomiju biudžetnych srodkaŭ. Adzin z punktaŭ pastanovy abaviazvaje ŭsie biełaruskija kanały pierajści na farmat niezaležnaha kino. Tak što zastajecca tolki pazajzdrościć biełaruskamu hledaču. Na žal, my, eŭrapiejcy, i nadalej pryrečanyja hladzieć usiakuju hlamurnuju papsu — pirataŭ Karybskaha mora i indyjanaŭ džonsaŭ. Paźniej my pahladzim vypusk infarmacyjna‑analityčnaj prahramy «Kontury» ŭ novym farmacie, a zaraz spytajem haściej, što jany dumajuć pra biełaruski kinaavanhard?

Łars fon Tryjer: Što skazać? U niekatoraj stupieni Azaronak praciahvaje maju škołu «Dohmy» (u hety momant na tvary Hadara źjaŭlajecca hrymasa ździŭleńnia): heta, naprykład, maksymalny minimalizm rekvizytaŭ i dekaracyj. Uzhadajcie choć by kadry filmu «Tajemnyja spružyny duchoŭnaj vajny» pra lahiery terarystaŭ z apazycyi va Ŭkrainie. U finale ŭ statyčnym kadry paŭhadziny tupa staić zedlik. Prahladzieŭšy karcinu, ja byŭ tak uražany, što chacieŭ prosta ŭ kinazali prahałasavać za kandydataŭ Baćki na parlamenckich vybarach. Tolki maja škoła vałodaje takimi pryjomami!

Žan‑Luk Hadar: Ciu! Kali Azaronak — «Dohma», to ja Śpiłberh. Usiakamu niezaležnamu kino ŭłaścivy prymityvizm. Vy što, chacieli kab Azaronak rabiŭ roliki pra seminary apazycyi, jak «Panarama»: na ekranie palityki daviacca pajkaj na bankiecie? Azaronak ža raspaviadaje pra seminary hienijalna prosta: zdymaje svaju levuju nahu. Jaki symbalizm! Jakaja hłybinia! Vidavočna, stužki Azaronka — absalutna lahičny praciah majoj «Novaj chvali». Eratyzm — składnik našaj škoły — tak i pre z karcinaŭ Azaronka.

ŁfT: Dzie vy tam bačyli eratyzm? U Azaronka ŭsio adpaviadaje majoj schiemie: nijakich nierealnych zababonaŭ.

ŽŁH: A saha pra čarhovuju elehantnuju pieramohu? U finale hieroj hazetaj «Savieckaja Biełarusija» zabivaje na kuchni tarakana. Vy nie źviarnuli ŭvahu, što «SB» pry hetym skručanaja. Usio pavodle Frojda: seks, luboŭ pieramahajuć zło! Faktyčna Azaronak pa‑novamu pračytaŭ majho kalehu Fransua Trufo.

ŁfT: Jakaja łuchta! Moža, vy jašče znajšli ŭ pracach Azaronka relatyvizm, charakterny dla vašych chałturak? Skažycie jašče, što heta vy natchnili jaho na hienijalny film pra amerykanski fond, dzie pakazvajecca prybyćcio elektryčki Baranavičy—Miensk. Heta typovaja «Dohma»!

ŽŁH: «Chvala»!

ŁfT: «Dohma»! «Dohma»! «Dohma»! (Bje Hadara levaj nahoj).

Viadoŭca: Nu, dosyć užo. U nas na suviazi Miensk, dzie zaraz pačynajecca tranślacyja prahramy «Kontury» ŭ farmacie niezaležnaha kino. Hladzim na ekran.

Na ekranie viadoŭca prahramy «Kontury»

Viadoŭca: Takim čynam, jak vy zrazumieli ź piacichvilinnaj karcinki pra ciubik z zubnoj pastaj, kraina prosta kvitnieje. A zaraz pahavorym pra apazycyjny kanał «Biełsat». Hladzicie materyjał našaha karespandenta.

Na ekranie čałaviek vyrazaje svajo voka

ŁfT, ŽŁH, viadoŭca (razam): Hienijalna

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?