Biełaruś moža damovicca ab novaj prahramie finansavańnia ź Mižnarodnym valutnym fondam da kanca hoda, zajaviŭ žurnalistam 3 kastryčnika ŭ Pałacie pradstaŭnikoŭ ministr finansaŭ Uładzimir Amaryn.

«My ličym, što šancy damovicca z MVF da kanca hoda isnujuć», — adznačyŭ Amaryn. Jon paviedamiŭ, što biełaruskija ŭłady na hetym tydni praciahnuć pieramovy ź mižnarodnaj arhanizacyjaj.

«Zaŭtra, 4 kastryčnika, biełaruskaja delehacyja nakirujecca ŭ Vašynhton dla ŭdziełu ŭ štohadovym schodzie MVF, tam buduć praciahnutyja pieramovy z valutnym fondam pa prahramie», — raskazaŭ Uładzimir Amaryn.

Pry hetym jon kanstatavaŭ, što abmierkavańnie hetaha pytańnia (budučaj prahramy z MVF) na siońniašniaj naradzie z udziełam Alaksandra Łukašenki «było vostrym, tym nie mienš pieramovy z valutnym fondam praciahvajucca».

Jak adznačyŭ ministr finansaŭ, sustrečy biełaruskich uładaŭ ź misijaj MVF, jakaja apošnija dva tydni pracavała ŭ Minsku, «pakazali, što našy pazicyi zbližajucca, razumieńnie palapšajecca, i my budziem u pracesie pieramovaŭ damaŭlacca».

Biełaruskija ŭłady viaduć pieramovy ab atrymańni novaha kredytu Mižnarodnaha valutnaha fondu na 3 młrd dołaraŭ prykładna pad 2,3% terminam na 10 hadoŭ. Kamientujučy ŭmovy, jakija vyłučaje MVF dla pačatku novaj kredytnaj prahramy, Alaksandr Łukašenka na naradzie 3 kastryčnika raskrytykavaŭ pazicyju MVF pa niekatorych pytańniach. «Kali ich ŭmovy pračytaješ, usio zvodzicca da adnaho: nijakaha pavyšeńnia zarpłaty, nieadkładnaje pavyšeńnie taryfaŭ i inšaha. Kamunisty b skazali — na ŭdušeńnie naroda. Ja nie chaču skazać, što nas niechta choča zadušyć. Nas nichto nie panukaje, ale, na žal, formuła takaja», — skazaŭ Łukašenka.

Pry hetym jon zaŭvažyŭ, što nie ŭsie patrabavańni MVF «padychodziać pad hetu niehatyŭnuju farmuloŭku».

Na naradzie Alaksandr Łukašenka adznačyŭ, što jamu prapanoŭvajuć padpisać list na imia kiraŭnika MVF Kryścin Łahard, jakoje idzie nasupierak z dadzienymi narodu abiacańniami. «Heta źnievažalna nie tolki dla mianie. Heta źnievažalna ŭ dačynieńni da našaha naroda», — zajaviŭ Łukašenka.

Pa vynikach narady kiraŭnik Nacbanka Pavieł Kałaur zajaviŭ žurnalistam, što list Biełarusi ab namierach da Mižnarodnaha valutnaha fondu budzie dapracavany.

U adpaviednaści z praviłami MVF, kraina, jakaja pretenduje na atrymańnie finansavańnia, nakiroŭvaje adpaviedny list ab namierach. Da jaho prykładajecca miemarandum ab kankretnych makraekanamičnych dziejańniach.

«Biezumoŭna, z ulikam siońniašniaj narady ŭ kiraŭnika dziaržavy i kansultacyj u Vašynhtonie, my dapracujem hety list z ulikam niepasredna intaresaŭ našaj dziaržavy. I pry nieabchodnaści nakirujem jaho ŭ MVF. Kankretnaje napaŭnieńnie lista my ŭzhodnim, niepasredna pravioŭšy kansultacyi spačatku ŭ Vašynhtonie z kiraŭnictvam Mižnarodnaha valutnaha fondu, a potym ŭnutry našaj krainy», — cytuje Kałaura dziaržaŭnaje ahienctva BiełTA.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?