Inžyniernaja hrupa asobnaha pałka śpiecyjalnaha pryznačeńnia Nacyjanalnaj hvardyi Ukrainy «Azoŭ» stvaryła bronieaŭtamabil BKM, radykalna pierarabiŭšy savieckuju BRDM-2.

BRDM-2 — braniravanaja raźviedvalna-dazornaja mašyna vysokaj prachodnaści, jakaja vypuskałasia z 1963 pa 1989 hod i była ŭzbrojenaja adnym 14,5-mm i adnym 7,62-mm sparavanymi kulamiotami.

Ukraincy nazvali svaju raspracoŭku BKM — bajavaja kołavaja mašyna.

Pieršy ŭzor ukrainskaj BKM.

Pieršy ŭzor ukrainskaj BKM.

Raniej biełaruskija inžyniery barysaŭskaha 140-ha ramontnaha zavoda raspracavali i vyrabili mabilny braniravany transpartny srodak (MBTS) «Kajman» na bazie toj ža mašyny.

BKM budzie prezentavanaja na forumie «Zbroja i biaśpieka» u Kijevie, jaki pačniecca 11 kastryčnika hetaha hoda, piša redaktar ukrainskaha časopisa Defense Express Sierhij Zhureć.

«Azoŭskija» inžyniery pavialičyli abaronu mašyny ad min i vybuchovych prystasavańniaŭ, zrabiŭšy dnišča BKM u vyhladzie litary V. Taksama paviadamlajecca, što dla uzmacnieńnia balistyčnaj abarony korpus padzieleny na prostakutnyja soty, jakija zakryvajucca braniravanymi nakładkami. Pamiž branioj korpusa i źniešnimi źjomnymi braniaplitami stajać modulnyja elemienty abarony, jakija možna chutka zamianić u palavych umovach.

Takim čynam, zhodna ź infarmacyjaj časopisa, BKM, u adroźnieńni ad BRDM-2, zdolnaja abaranić ekipaž ad braniabojnych kul 12,7 mm. Pry hetym masa mašyny vyrasła da 8 z 7 ton, chutkaść moža dasiahać 95 km/h, a zapas chodu — 500 km. Mohuć vykarystoŭvacca roznyja bajavyja moduli. Pra zamienu ruchavika nie paviedamlajecca.

Nakolki hetyja zajavy adpaviadajuć rečaisnaści pakažuć vyprabavańni, jakija pačnucca paśla vystavy ŭ Kijevie.

Biełaruski «Kajman» zachavaŭ masu 7 ton, maje chutkaść da 110 km/h i zapas chodu da 1000 km. «Kajman» atrymaŭ dyzielny ruchavik D-245 z elektronnaj sistemaj kiravańnia padačaj paliva, piacistupienievuju tranśmisiju, niezaležnuju tarsijonnuju padviesku.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?