Supracoŭniki ŭpraŭleńnia kryminalnaha vyšuku HUUS Minharvykankama, adździeła kryminalnaha vyšuku Kastryčnickaha RUUS pry padtrymcy bajcoŭ śpiecpadraździaleńnia «Ałmaz» za razboj u kvatery pa Varanianskaha zatrymali 26-hadovaha ŭradženca Ivacevickaha rajona i 28-hadovaha ŭradženca Łahojska. U Minsku jany pracavali ŭ adnoj sa słužbaŭ taksi, jeździli na mašynach «Aŭdzi A4» i «Nisan Almiera». Žyli na zdymnych kvaterach.

Svaje złačynnyja dziejańni maładyja ludzi zahadzia spłanavali. Na adnym ź internet-sajtaŭ jany znajšli dziaŭčynu, jakaja akazvaje intym-pasłuhi (vybar upaŭ na samuju darahuju), damovilisia ab sustrečy. Čakajučy klijentaŭ doma, dziaŭčyna i ŭjavić nie mahła, što zamiest ich u kvateru ŭvarvucca dvoje ŭ maskach i palčatkach i pad pahrozaj naža stanuć vymahać hrošy. Staranna daśledavaŭšy ŭsie pakoi (mužčyny šukali hrošy navat pad vuściłkami ŭ abutku), złamyśnikam udałosia razžycca na noŭtbuk, fotaaparat, dva mabilnyja telefony i nievialikuju sumu hrošaj. Schavaŭšy ŭsio heta ŭ mašynu, jany nakiravalisia na svaju zdymnuju kvateru pa vuł. Dzianisaŭskaj.

U vyniku karpatlivaj pracy minskich syščykaŭ mienš čym za sutki złamyśniki byli zatrymanyja. Adzin z pryjacielaŭ jechaŭ, zdavałasia b, na zvyčajny vyklik i navat nie padumaŭ, što jaho klijentam na hetym vykliku akažacca milicyjant. Praź niekatory čas zatrymany byŭ i druhi padazravany.

— Jak vyśvietlili supracoŭniki kryminalnaha vyšuku, na rachunku hetaha kryminalnaha tandemu nie adno padobnaje złačynstva, — paviedamiŭ namieśnik načalnika ŭpraŭleńnia kryminalnaha vyšuku HUUS Minharvykankama Mikałaj Šybałka. — Jany navat prymudralisia abkradać svaich pasažyraŭ, kali tyja pa šlachu prasili spynicca, naprykład, kala mahazina. Klijent, adłučyŭšysia nienadoŭha, pakidaŭ rečy ŭ mašynie, a taksisty ščaśliva źjazdžali. Ździajśniali złamyśniki i drobnyja kradziažy. U ciapierašni čas dakazana niekalki faktaŭ.

Pravodziačy ŭ kvatery zatrymanych pieratrus, apieratyŭniki vyjavili maski, palčatki, u jakich złačynny duet napaŭ na dziaŭčynu, vialikuju kolkaść sim-kart, šmatlikija razdrukoŭki ź mietadyčnymi ŭkazańniami firmaŭ pa prodažy roznych tavaraŭ. Złamyśnikaŭ cikaviła, jak uvachodzić da ludziej u davier, jak zavodzić havorku, na što źviartać uvahu, kali zachodziš u čužuju kvateru. Heta značyć «skarać» stalicu pryjacieli rychtavalisia surjozna. Varta adznačyć, što raniej 28-hadovy mužčyna sudzimy za rabavańnie, chulihanstva i niezakonny abarot narkatyčnych srodkaŭ.

U ciapierašni čas u dačynieńni da zatrymanych Kastryčnickim (h. Minska) RASK zaviedzienaja kryminalnaja sprava pa č. 2 art. 207 («Razboj») Kryminalnaha kodeksa Respubliki Biełaruś. Kali Vy paciarpieli ad złačynnych dziejańniaŭ mužčyn na fota, prosim źviartacca ŭ milicyju pa telefonach: 8 (033) 320-44-24, 8 (029) 392-45-71, 8 (017) 239-41-75, 8 ( 017) 239-41-76.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?