Radyjenuklidy vyjaŭleny ŭ arhaniźmie 100% abśledavanych hramadzian, jakija žyvuć na terytoryi Pinska (Bresckaja vobłaść) i Pinskaha rajona. Pra heta ŭ intervju BiełaPAN paviedamiŭ člen‑karespandent Nacyjanalnaj akademii navuk Biełarusi Ivan Nikitčanka.

Takija, pavodle jaho słoŭ, vyniki realizacyi hramadskaha prajekta pa infarmacyjnym zabieśpiačeńni sistemy radyjacyjnaj abarony ludziej u Pinskim rajonie. Inicyjataram i kurataram prajekta, jaki ažyćciaŭlajecca z 1 krasavika pry padtrymcy dziaržstruktur, źjaŭlajecca prafiesar I.Nikitčanka.

Jon raskazaŭ, što radyjenuklidy vyjaŭleny ŭ arhaniźmie ŭsich 34 vypadkova vybranych i abśledavanych žycharoŭ Pinska i navakolnych viosak.

«Pryčym usie abśledavanyja skardziacca na chraničnyja zachvorvańni. Padobnyja vyniki byli niadaŭna atrymany ŭ Vałožynskim rajonie Minskaj vobłaści, Lelčyckim rajonie Homielskaj vobłaści, Minskim rajonie i Minsku. Heta śviedčyć ab tym, što na ŭsioj terytoryi krainy zachoŭvajecca niebiaśpieka radyjacyjnaha zabrudžvańnia arhanizmu praz pradukty charčavańnia. U hetaj situacyi nieabchodna mianiać dziaržaŭnuju kancepcyju biaśpiečnaha pražyvańnia na terytoryjach, zabrudžanych radyjacyjaj, pakolki ŭsia Biełaruś zaražana radyjenuklidami. Voś čamu pavinna być paŭsiudnaj sistema radyjacyjnaj abarony nasielnictva», — padkreśliŭ vučony.

Pavodle jaho słoŭ, radyjenuklidy ŭ luboj kolkaści škodnyja dla arhanizmu, pakolki razburajuć jaho kletki i imunitet, robiacca pryčynaj roznych chvarob i skaračajuć praciahłaść žyćcia čałavieka.

Adnahadovy prajekt praduhledžvaje praviadzieńnie infarmacyjnych sieminaraŭ z vałanciorami z 24 rajonaŭ Bresckaj, Homielskaj, Minskaj i Mahiloŭskaj abłaściej z udziełam supracoŭnikaŭ PUP «Biełaruski instytut radyjacyjnaj abarony» («Biełrad») i byłoha Instytuta radyjacyjnaj miedycyny i endakrynałohii Ministerstva achovy zdaroŭja. Na kožnym sieminary z udziełam dabravolcaŭ razhladajucca pytańni radyjeaktyŭnaha zabrudžvańnia ludziej, ich miedycynskaha abśledavańnia, a taksama praduchileńnia traplańnia radyjenuklidaŭ u arhanizm čałavieka. Arhanizatary prajekta ličać, što viedy, atrymanyja na sieminarach, vałanciory raspaŭsiudziać siarod nasielnictva rehijonaŭ, najbolš paciarpiełych ad nastupstvaŭ avaryi na ČAES.

Dla praviadzieńnia pieršasnych i kantrolnych daśledavańniaŭ vykarystoŭvajucca mabilnyja łabaratoryi, asnaščanyja abstalavańniem dla vymiareńnia radyjacyjnaha zabrudžvańnia čałavieka i praduktaŭ charčavańnia. Hetyja łabaratoryi pieradadzieny biełaruskaj hramadskaści amierykanskimi dabračyncami.

Marat Haravy, BiełaPAN

Клас
0
Панылы сорам
0
Ха-ха
0
Ого
0
Сумна
0
Абуральна
0