1. Styvien Kinh «11/22/63»
Mini-sieryjał pavodle adnoj z najlepšych fantastyčnych knih Karala žachaŭ pačnie vychodzić z 15 lutaha. Čakajecca 9 sieryj. Hałoŭnuju rolu vykanaje Džejms Franka («127 hadzin», 2010).
Siužet budujecca vakoł dapuščeńnia, što padarožža ŭ minułaje stanovicca mahčymym tolki ŭ adzin dzień 1958-ha. Hetym vyrašaje skarystacca nastaŭnik anhlijskaj movy Džejk Epinh z amierykanskaha miastečka. Jon adpraŭlajecca ŭ minułaje, kab praduchilić zabojstva Kienedzi, a taksama vyratavać žyćcio siabru, ale ŭ vyniku pryviazvajecca da žyćcia ŭ minułym stahodździ.
2. Džodžo Mojes «Da sustrečy z taboj»
Brytanskaja piśmieńnica z žurnalisckaj adukacyjaj pradstaŭlaje płyń sučasnych pładavitych tvorcaŭ, što vypuskajuć u hod pa ramantyčnym ramanie i zarablajuć novyja i novyja ŭznaharody. Džodžo paśpieła papracavać kiroŭcam taksi i naborščykam šryfta Brajla, a ciapier kožnaja raskazanaja joj žyćciovaja historyja karystajecca niervierahodnym pośpiecham u čytačak.
3 sakavika vyjdzie adnajmienny film pa knihie «Da sustrečy z taboj» — historyja Łu i Uiła. Hetaja sustreča źmienić ich žyćcio.
Hałoŭnyja roli vykanajuć Emilija Kłark, zorka «Hulni tronaŭ», i Sem Kłaflin.
3. Patrycyja Chajśmit «Cana soli» («Kerał»)
Pieršy raman amierykanskaj piśmieńnicy 50-ch «Nieznajomcy ŭ ciahniku» prynios joj pośpiech i byŭ ekranizavany Alfredam Chičkokam. Druhaja kniha «Cana soli» vyjšła pad psieŭdanimam, jana pryśviečanaja niepapularnaj u toj čas temie — adnapołamu kachańniu.
Film vyjdzie 10 sakavika pad nazvaj «Kerał». Dźvie žančyny z roznych sacyjalnych słajoŭ, Tereza i Kerał, sustrenucca, kab spaznać sapraŭdnaje kachańnie. Hałoŭnyja roli vykanajuć Kiejt Błanšet i Runi Mara.
4. Ljuis Kerał «Alisa ŭ Zalustroŭi»
Praciah znakamitaj knihi «Alisa ŭ krainie cudaŭ» pradziusiruje Cim Biortan, choć u 2010-m byŭ režysioram pieršaj častki. Akciorski skład pakinuli bieź źmienaŭ: Alisu syhraje Mija Vasikoŭska, Šlapnika — Džoni Dep, Čyrvonuju karalevu — Chielena Bonem Karter, Biełuju karalevu — En Cheteŭej.
Stužka vyjdzie ŭ prakat 26 maja.
5. Roald Dal «Vialiki i dobry vołat»
Kłasik brytanskaj dziciačaj litaratury napisaŭ knihu «Čarli i šakaładnaja fabryka», udała ekranizavanuju Cimam Biortanam u 2005. Ciapier za ekranizacyju Dala ŭziaŭsia sam Styvien Śpiłbierh.
22 červienia vyjdzie film pra dziaŭčynku Safi, jakaja adnojčy nie mahła zasnuć i ŭ akienca ŭbačyła vializnaha vołata, jaki padychodziŭ da susiednich damoŭ i dźmuŭ u vokny spalniaŭ. U poŭnaj adpaviednaści sa staradaŭnimi pavierjami i dziciačymi strašyłkami, vołat ubačyŭ Safi i zabraŭ da siabie, u krainu vołataŭ.
U hałoŭnych rolach — Rebieka Choł i Mark Rajłens.
6. Poła Chokins «Dziaŭčyna ŭ ciahniku»
Jaskravy debiut brytanskaj žurnalistki, jakaja ŭ adzin dzień pračnułasia znakamitaj paśla vychadu ramana 1 lutaha 2015. Kniha 13 tydniaŭ zastavałasia ŭ pieršym radku biestseleraŭ pa viersii The New York Times.
Rejčał štodzień jeździć ŭ elektryčcy ŭ Łondan i praz akno naziraje za žyćciom siamiejnaj pary ŭ domie na adnym z prypynkaŭ. Jana navat prydumlaje im imiony - Džes i Džejsan. Adnak niečakana Džes źnikaje. Rejčał adčuvaje biadu, ale ŭpeŭnienaja, što zmoža razhadać tajamnicu.
Film vyjdzie 6 kastryčnika. U hałoŭnych rolach zdymucca Emili Błant i Rebieka Fierhiusan.
7. Den Braŭn «Infierna»
Čaćviertaja kniha ab pryhodach prafiesara Robierta Łenhdana i treciaja poŭnamietražnaja ekranizacyja detektyvaŭ Braŭna vyjdzie 12 kastryčnika.
Siužet, jak zaŭždy, uražvaje svajoj hłabalnaściu. Łenhdan prychodzić u prytomnaść u adnoj ź italjanskich balnic, całkam straciŭšy pamiać. Miascovaja doktarka Sijena Bruks sprabuje dapamahčy Robiertu nie tolki adnavić uspaminy, ale i spynić zahadkavych złamyśnikaŭ, jakija majuć namier raspaŭsiudzić śmiarotny virus.
U hałoŭnaj roli pa-raniejšamu oskaranosny Tom Chenks, a paru jamu składzie Fielisici Džons.
8. Patryk Nes «Hołas pačvary»
Amierykanski piśmieńnik, jaki śpiecyjalizujecca na knihach dla padletkaŭ, vydaŭ u 2011-m «Hołas pačvary», ščodra azdobleny atmaśfierymi ilustracyjami Džyma Keja. Za ekranizacyju strašnaj historyi pra monstra ŭziaŭsia ispanski režysior Chuan Antonia Bajona, jaki zdymaje ŭ žanry chorar.
Trynaccacihadovy chłopčyk Konar vymušany pryniać navinu ab chutkaj śmierci maci. Źmirycca z hetym, pieražyć stratu jamu dapamahaje monstr ź jaho snoŭ, stary cis, jaki pieratvarajecca ŭ pačvaru, kali chłopčyku asabliva kiepska.
Stužka vydzie 14 kastryčnika. Pačvaru syhraje Liam Nisan, Konara - Ljuis MakDuhał, a jaho babulu — Sihurni Uivier.
9. Rensam Ryhz «Dom dziŭnych dziaciej»
Jašče adzin jarki debiut u žanry chorar čakaje vychadu na ekrany. Amierykaniec Ryhz, piśmieńnik i scenaryst, vypuściŭ «Dom dziŭnych dziaciej» u 2011. Kniha była ilustravanaja starymi fotazdymkami dziaciej i zaniała pačesnaje miesca ŭ śpisie biestseleraŭ. Ciapier Ryhz pracuje nad praciaham.
U dziacinstvie dzied časta raskazvaŭ Džejkabu pra prytułak dla niezvyčajnych dziaciej. Siarod jaho nasielnikaŭ była dziaŭčynka, jakaja ŭmieła trymać u rukach ahoń, niabačny chłopčyk i dvajniaty, jakija ŭmieli razmaŭlać biez słoŭ. Kali dzied pamiraje, 16-hadovy Džiejkab adpraŭlajecca na vyspu. Tam jon znachodzić dziaciej, jakich raniej bačyŭ tolki na fotazdymkach.
Ekranizavać knihu budzie Cim Biortan, amatar dziŭnych historyj. Vychad pryznačany na 3 sakavika.
10. Kłajv S. Ljuis «Srebnaje kresła»
Na hety hod zapłanavany pierazapusk franšyzy «Chroniki Narnii». Sieryja filmaŭ budzie pačynacca z čaćviortaj knihi i razam z praciaham utvoryć novuju franšyzu. Dziejańnie budzie adbyvacca praź dziesiacihodździ paśla padziej, raskazanych u «Skaralniku zary» (2010). Novymi hierojami stanuć Justas Vred, jaki ŭžo źjaŭlaŭsia ŭ apošnim filmie, i jaho adnakłaśnica Džył Poŭł. Nichto ź siamji Pevensi bolš nie moža trapić u Narniju, bo jany stali darosłymi.
Uciakajučy ad školnikaŭ-kataŭ, Justas i Džył traplajuć u Narniju. Leŭ Asłan daručaje im znajści syna Kaśpijana, prynca Rylijana, jaki byŭ vykradzieny dziesiać hadoŭ tamu. Dzieci adpraŭlajucca na pošuki prynca ŭ paŭnočnyja ziemli, nasielenyja vołatami. Ich supravadžaje ekscentryčny kvakl Chmur.
