Śledčy kamitet rasśleduje kryminalnuju spravu ŭ dačynieńni da słužbovych asob AAT «Homielski miasakambinat», Homielskaha abłvykankama i Ministerstva sielskaj haspadarki i charčavańnia. 

Pa kryminalnaj spravie ŭ jakaści padazravanych pryciahnutyja bolš za 10 čałaviek. Ich dziejańni kvalifikavanyja pa č. 3 art. 424 KK (złoŭžyvańnie ŭładaj i słužbovymi paŭnamoctvami).

Kryminalnaja sprava była raspačataja Kamitetam dziaržaŭnaj biaśpieki i pieradadzienaja ŭ SK dla dalejšaha rasśledavańnia, paviedamlaje Śledčy kamitet.

Nahadajem, 2 śniežnia 2015 hoda ŭ ŚMI pastupiła infarmacyja pra zatrymańnie pravaachoŭnymi orhanami namieśnika Homielskaha abłvykankama Alaksandra Maksimienki, dyrektara Homielskaha miasakambinata Ryčarda Stefanoviča i inšych słužbovych asob za peŭnyja machinacyi ź miasam. U śniežni KDB ci SK nie kamientavali hetuju infarmacyju. 

Pavodle infarmacyi SK, niezabieśpiačeńnie naležnych umoŭ zachoŭvańnia miasnoj pradukcyi na Homielskim miasakambinacie z maja pa śniežań 2015 hoda pryviało da psavańnia bolš za 100 ton miasa. «Dyrektar kambinata, zaručyŭšysia padtrymkaj pieršaha namieśnika staršyni Homielskaha abłvykankama i namieśnika ministra sielskaj haspadarki i charčavańnia — dyrektara departamienta vieterynarnaha i charčovaha nahladu, nasupierak patrabavańniam narmatyŭnych aktaŭ, jakija pradpisvajuć utylizacyju takoj pradukcyi, arhanizavaŭ pierapracoŭku i realizacyju sapsavanaha miasa, što pastaviła ŭ niebiaśpieku žyćcio i zdaroŭje hramadzian», — infarmuje Śledčy kamitet.

Ciapier pravodzicca rabota pa zbory dokaznaj bazy. Atrymanyja źviestki ab tym, što adnym z matyvaŭ učynieńnia złačynstva słužbovymi asobami źjaviłasia imknieńnie ŭtaić sapraŭdnaje stanovišča spraŭ na pradpryjemstvie, dapuščanuju biezhaspadarčaść z boku kiraŭnictva, a taksama bojaź niehatyŭnych nastupstvaŭ dla siabie.

Śledstva zrabiła zachady pa vyjaŭleńni i kanfiskacyi sapsavanaj pradukcyi, jakaja ciapier nakiravanaja na ŭtylizacyju.

Hučnyja zatrymańni vysokich pradstaŭnikoŭ ułady adbyvalisia ŭ abłasnym centry i raniej. U vieraśni 2012 hoda byŭ zatrymany i zatym asudžany staršynia harvykankama Viktar Pilipiec. U mai 2014 hoda byli zatrymanyja pieršy namieśnik staršyni abłvykankama Viktar Bančuk i namieśnik staršyni abłvykankama Viktar Tryzna. Alaksandr Maksimienka i zaniaŭ praź niekatory čas kresła Viktara Bančuka. 

U Mahiloŭskim abłasnym sudzie ciapier iduć słuchańni kryminalnaj spravy, fihurantami jakoj źjaŭlajucca Bančuk i Tryzna. Im staviacca ŭ vinu taksama machinacyi ź miasam, jakoje pastaŭlałasia ŭ Rasiju bieź pieradapłaty, z-za čaho biełaruskija kambinaty nieśli straty.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?