Marcin Lutle, jaki źviarnuŭsia ŭ prakuraturu z nahody siužetu na Pieršym kanale, raspavioŭ u intervju DW, čamu jon abvinavačvaje rasijskaha karespandenta ŭ raspalvańni varožaści.

Marcin Lutle

Marcin Lutle

Siužet bierlinskaha karespandenta rasijskaha Pieršaha kanała Ivana Błahoha ab tym, što ŭ pačatku studzienia ŭ stalicy Hiermanii mihranty z arabskich krain vykrali i zhvałcili 13-hadovuju ruskamoŭnuju dziaŭčynku, vyklikaŭ u Hiermanii vielmi burnuju reakcyju. Bierlinskaja palicyja abvierhła źviestki ab vykradańni i zhvałtavańni, jakija źmiaščalisia ŭ materyjale. Inšych detalaŭ ab karotkačasovym źniknieńni dziaŭčynki ŭ palicyi pakul nie paviedamlajuć, spasyłajučysia na rasśledavańnie, jakoje praciahvajecca.

Tym časam niamiecki advakat Marcin Lutle (Martin Luithle) padaŭ u prakuraturu Bierlina chadajnictva ab praviercy zakonnaści hetaha siužetu. U intervju DW Lutle patłumačyŭ, što mienavita zdałosia jamu padazronym.

— Čamu vy vyrašyli padać u prakuraturu zajavu z patrabavańniem pravieści pravierku siužetu rasiejskaha Pieršaha kanała pra dziaŭčynku, nibyta zhvałtavanuju mihrantami?

— Ja razhladaju toje, što adbyłosia, jak surjoznaje ŭmiašalnictva ŭ našu pravavuju dziaržavu i jak vielmi niebiaśpiečnyja dziejańni, i chacieŭ hetamu supraćstajać.

— Jakoje kankretna złačynstva vy ŭhledzieli ŭ hetym siužecie?

— Na moj pohlad, tut mieła miesca raspalvańnie mižnacyjanalnaj varožaści. Ci było na samaj spravie ździejśniena złačynstva (karespandentam. — Red.), pakaža śledstva. Siońnia ranicaj (19 studzienia. — Red.) Ja adpraviŭ pa faksie svajo chadajnictva ŭ prakuraturu Bierlina. Jana pavinna pravieryć, ci dastatkova pradstaŭlenych mnoj dokazaŭ dla pačatku kryminalnaj spravy.

— Jakija dokazy vy padali?

— Usie hetyja dokazy jość u ahulnym dostupie. Heta videazapis siužetu ź niamieckimi subtytrami na partale YouTube, post na staroncy Anonymous Kollektiv u Facebook, zapis na sajcie Sputnik, spasyłajecca na błoh Anonymous Kollektiv. U vypadku z błoham Anonymous Kollektiv užo faktyčna dakazana, što pravakacyja spracavała: tam pa stanie na siońniašniuju ranicu videa pahladzieli ŭžo bolš jak 1,3 młn razoŭ, pastavili da jaho bolš za 14 tysiač łajkaŭ, zrabili bolš za 28 tysiač repostaŭ i napisali amal 3500 kamientaroŭ, častka ź jakich napoŭniena nianaviściu i zaklikami da hvałtu.

— Čyje intaresy vy pradstaŭlajecie ŭ hetaj situacyi?

— Ja nie pradstaŭlaju ničyje intaresy. Ja advakat, orhan ažyćciaŭleńnia pravasudździa, i nie chaču mirycca z hetym umiašańniem u niamieckuju pravavuju dziaržavu. Kali maje dovady zdaducca bierlinskaj prakuratury pierakanaŭčymi, materyjały buduć pieradadzienyja ŭ sud. U hetym vypadku za spravu voźmiecca dziaržabvinavačańnie, i ja nie budu udzielnikam pracesu. Maja rola zaklučajecca ŭ tym, kab inicyjavać śledčuju pravierku.

— Ci vieryŭ, pa-vašamu, sam karespandent Pieršaha kanała ŭ hetuju historyju, kali rychtavaŭ siužet?

— Heta vielmi sumnieŭna. Ja zychodžu z taho, što jon dziejničaŭ naŭmysna, inakš ja nie źviarnuŭsia by ŭ prakuraturu. My havorym nie pra amatara, a pra prafiesijnaha karespandenta. Jon pavinien razumieć roźnicu pamiž demanstracyjaj NDPH (pravaradykalnaj Nacyjanał-demakratyčnaj partyi Hiermanii. — Red.), na jakoj jon apynuŭsia, i mitynham ruskaj dyjaspary, pra jakuju jon apaviadaje ŭ repartažy.

Heta značyć, na mitynhu NDPH jon naŭmysna adšukaŭ piać ruskamoŭnych surazmoŭcaŭ i pakazaŭ hetuju padzieju jak mitynh ruskaj dyjaspary. Na staroncy abjadnańnia suprać prytułku dla biežancaŭ Marzahn u Facebook jość paviedamleńnie ab hetaj demanstracyi (nacyjanalistaŭ. — Red.), na jakuju zaklikali pryjści i «ruskamoŭnych siabroŭ». Ja znachodžu heta supadzieńnie vielmi cikavym. Heta značyć, usie źniešnija prykmiety kažuć ab nievypadkovych dziejańniach.

— Jak vy ličycie, jakaja była meta aŭtara repartažu?

— Vidavočna, jon pravakuje nianaviść da biežancaŭ. Repartaž źviernuty ŭ tym liku i da 6 miljonaŭ ruskamoŭnych žycharoŭ Hiermanii. I hetych ruskamoŭnych padbuchtorvajuć da jakich-niebudź dziejańniaŭ, pravakujučy hvałt.

— Jakoje pakarańnie moža pahražać žurnalistu, kali sprava dojdzie da suda?

— Za padobnaje złačynstva praduhledžana pazbaŭleńnie voli na termin ad troch miesiacaŭ da piaci hadoŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0