Viartańnie kantrolu nad terytoryjami Danbasa budzie adnym z pryjarytetaŭ uładaŭ krainy ŭ 2016 hodzie, zajaviŭ prezident Ukrainy Piatro Parašenka.

«U 2016 hodzie my adnovim ukrainski suvierenitet na akupavanych terytoryjach Danieckaj i Łuhanskaj abłaściej», — skazaŭ jon na pres-kanfierencyi ŭ čaćvier.

«Viartańnie Danbasa budzie vyrašacca palityka-dypłamatyčnym šlacham», — dadaŭ Parašenka.

U noč na čaćvier trochbakovaj kantaktnaj hrupaj pad ehidaj ABSIE była pryznačanaja čarhovaja data poŭnaha spynieńnia ahniu na ŭschodzie Ukrainy. Da hetaha baki damovilisia pra abmien pałonnymi.

Akramia taho, prezident Ukrainy prapanavaŭ stvaryć mižnarodny dypłamatyčny miechanizm dla «deakupacyi» Krymskaha paŭvostrava.

«My prapanujem stvaryć mižnarodny miechanizm dla deakupacyi paŭvostrava. Aptymalnym farmatam dla ŭkaranieńnia takoha miechanizmu źjaŭlajecca farmat «Ženieva plus» pry ŭdziele našych partnioraŭ ź Jeŭrapiejskaha sajuza, Złučanych Štataŭ Amieryki i, mahčyma, krain-padpisantaŭ Budapiešckaha miemaranduma», — skazaŭ jon.

Havoračy pra vyniki hoda, Parašenka zajaviŭ, što Ukraina pieraadoleła zaležnaść ad rasijskich enierharesursaŭ.

«Padsumoŭvajučy minuły hod, ja nie mahu nie skazać pra enierhietyčnuju niezaležnaść ad Rasii, jakuju my ŭžo ŭvasobili ŭ žyćcio. Hazavaja ihołka, na jakoj kraina siadzieła dziesiacihodździami, zdavałasia našym pažyćciovym praklonam. Navat u samych śmiełych marach nie mahło ŭjavicca, što my kali-niebudź pieraadolejem zaležnaść ad rasijskaha hazu», — zajaviŭ prezident. Pavodle jaho słoŭ, Ukraina jašče ŭ minułym hodzie pačała zakuplać vialikuju častku svajho hazu ŭ jeŭrapiejskich krain.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?