Karystalniki mabilnych pryładaŭ na bazie Android mohuć biaspłatna spampavać cełuju knižnuju paličku prailustravanych dy ahučanych knih na biełaruskaj movie. Akramia taho, prahrama paraduje maleču muzykaju dy śpievami: u asobnym raździele jany znojduć cudoŭnyja piesieńki hurta «Ahatka» na słovy viadomych biełaruskich paetaŭ, a taksama zbornik tematyčnych piesieniek-raźminak.

Dla samych maleńkich — niekalki dziasiatkaŭ biełaruskich kałychanak: sučasnych i aŭtentyčnych, ulubionych i małaviadomych. Baćki zmohuć nie tolki vykarystać płejer i prasłuchać śpievy razam ź dziećmi, ale i pračytać słovy, vyvučyć ich, kab nastupnym razam praśpiavać kałychanku samim.

Stvaralniki «Krainy kazak» spadziajucca, što dziakujučy hetaj prahramie, jakaja daje lohki dostup da tvoraŭ na biełaruskaj movie, bolš baćkoŭ pačnuć čytać dzieciam biełaruskija knihi, i biełaruskaja mova pierastanie być dla dziaciej «druhoju rodnaju».

«Na siońniašni dzień sapraŭdy isnuje takaja prablema, — dzielicca svaim mierkavańniem kaardynatarka prajektu Taćciana Cukanava, — dzieciam niama dzie pačuć biełaruskuju movu. My stvaryli prahramu ź jakasnym i biaspłatnym kantentam, kab zaachvocić biełarusaŭ čytać dzieciam pa-biełarusku fajnyja knihi, słuchać i śpiavać kałychanki dy viasiołyja piesieńki na słovy biełaruskich paetaŭ, šanavać svajo i hadavać dzietak biełarusami.»

«U prahramie jość asobny raździeł ź biełaruskimi kałychankami, dzie my abjadnali dobra viadomyja i ŭpadabanyja kałychanki dy aŭtentyčnyja śpievy z archivu Instytuta mastactvaznaŭstva, etnahrafii i falkłoru — raspaviadaje stvaralnik prahramy Aleś Bułojčyk. — My spadziajemsia, što hety raździeł budzie vielmi karysny maładym baćkam.» «Kałychanka – heta toje, što čujuć dzieci z samaha malenstva, i chiba nie cudoŭna, kali heta budzie aŭtentyčny miłahučny śpieŭ na biełaruskaj movie?», — dadaje dyzajnier Ludmiła Navakoŭskaja.

Spampavać prahramu možna z Google Play.

Stvaralniki «Krainy kazak» płanujuć dapracoŭvać i raźvivać prahramu. Kožny moža dapamahčy zaŭvahami dy prapanovami, dasłaŭšy ich na adras [email protected]. Svaim mierkavańniem možna padzialicca, adkazaŭšy na niekalki pytańniaŭ.

Nahadajem, što dla karystalnikaŭ iPad isnuje prahrama «Knihi dzietkam» z prailustravanymi i ahučanymi knihami na biełaruskaj movie, jakija taksama dasiažnyja dla spampoŭvańnia zadarma z https://itunes.apple.com/by/app/knigi-dzetkam/id786269247?mt=8

Клас
Панылы сорам
Ха-ха
Ого
Сумна
Абуральна