Biełaruskija pravaabaroncy patrabujuć ad administracyi škłoŭskaj kałonii spynić ckavańnie Andreja Bandarenki. Adpaviedny zvarot adpraviŭ u Departamient vykanańnia pakarańniaŭ (DVP) MUS Biełarusi zakryty ŭładami pravaabarončy centr «Viasna». Aŭtary zvarotu ŭpeŭnienyja, što ckavańnie Andreja Bandarenki ŭ kałonii źviazana ź jaho pravaabarončaj dziejnaściu, paviedamlaje sajt spring96.org.

Jak viadoma, Bandarenka byŭ stvaralnikam i kiraŭnikom infarmacyjna-aśvietnaj ustanovy «Płatforma» i kulturna-aśvietnaj ustanovy «Płatform inaviejšn», jakija zajmalisia abaronaj pravoŭ čałavieka ŭ miescach pazbaŭleńnia voli. 12 žniŭnia 2014 hoda sud pryznaŭ jaho vinavatym pa troch častkach artykuła 339 Kryminalnaha kodeksa (chulihanstva, złosnaje chulihanstva i asabliva złosnaje chulihanstva) i pryhavaryŭ da čatyroch hadoŭ pazbaŭleńnia voli ŭ kałonii ŭzmocnienaha režymu. Paźniej u suviazi z amnistyjaj termin byŭ skaročany da troch hadoŭ.

U svaim zvarocie pravaabaroncy zaznačajuć, što i ŭ papraŭčaj kałonii № 2 Babrujska, i ŭ PK № 17 Škłova, dzie adbyvaŭ i adbyvaje pakarańnie Bandarenka, nieadnarazova ŭźnikała niebiaśpieka dla jaho žyćcia i zdaroŭja. U metach biaśpieki jaho źmiaščali ŭ izalavanyja kamiery. «Heta adbyłosia ŭ suviazi z paturańniem administracyj kałonij ustanaŭleńniu siarod źniavolenych niefarmalnych adnosin, što dazvalała stvarać umovy dla žorstkaha, prynižalnaha abychodžańnia z asobnymi asudžanymi», — havorycca ŭ zvarocie. 

Pravaabaroncy nahadvajuć načalniku DVP MUS Siarhieju Darošku, što dziaržava ŭ Biełarusi harantuje abaronu pravoŭ, svabod i zakonnych intaresaŭ asudžanych. «Asudžanyja majuć prava na asabistuju biaśpieku. Pry ŭźniknieńni pahrozy asabistaj biaśpieki asudžanaha jon maje prava źviarnucca z zajavaj ab zabieśpiačeńni asabistaj biaśpieki da luboj słužbovaj asoby ŭstanovy, jakaja vykonvaje pakarańnie. U hetym vypadku słužbovaja asoba abaviazanaja nieadkładna pryniać miery pa zabieśpiačeńni asabistaj biaśpieki asudžanaha. Načalnik ustanovy prymaje rašeńnie ab pieravodzie asudžanaha ŭ biaśpiečnaje miesca abo inšyja miery, jakija likvidujuć pahrozu asabistaj biaśpieki asudžanaha», — zaznačajecca ŭ zvarocie.

Jaho aŭtary ličać mahčymym śćviardžać, što «z usich mahčymych mier administracyja vyšejzhadanych kałonij ažyćciaviła tolki adnu, jakaja nie vyrašaje prablemy asudžanaha i pravaparadku ŭ kałonijach u cełym, a abmiažoŭvaje stupień jaho svabody adnosna praviłaŭ adbyvańnia pakarańnia ŭ vyhladzie pazbaŭleńnia voli». 

«Kiraŭnictva kałonii, zamiest abarony pravoŭ źniavolenaha pravaabaroncy, farmalna i biez uliku asablivych umoŭ, stvoranych niekatoraj častkaj źniavolenych dla A.Bandarenki, pry adsutnaści naležnaha kantrolu administracyi kałonii, adreahavała na farmalnaje parušeńnie im dyscyplinarnych praviłaŭ. A.Bandarenka atrymaŭ niekalki dyscyplinarnych spahnańniaŭ, staŭ «złosnym parušalnikam» paradku adbyvańnia pakarańnia, u vyniku čaho byŭ pazbaŭleny prava na amnistyju. Bolš za toje, administracyja kałonii vykazała namier zrabić bolš žorstkimi ŭmovy jaho ŭtrymańnia — źmiaścić u turmu», — havorycca ŭ zvarocie.

Pravaabaroncy zaklikajuć DVP spynić nieabhruntavany pieraśled Bandarenki z boku administracyi kałonii; pravieści pravierku ŭmoŭ jaho ŭtrymańnia; abaviazać kałoniju stvaryć biaśpiečnyja ŭmovy ŭtrymańnia asudžanaha, jakija nie prynižali b jaho čałaviečuju hodnaść; dazvolić Bandarenku sustreču z pradstaŭnikami pravaabarončych arhanizacyj.

Zvarot padpisany kiraŭnikom centra «Viasna», byłym palitviaźniem Alesiem Bialackim. 

Miesiacam raniej hrupa hramadzian adpraviła ŭ DVP kalektyŭny zvarot z patrabavańniem spynić katavańni ŭ dačynieńni da Andreja Bandarenki. Jany papiaredzili: kali katavańni ŭ dačynieńni da Bandarenki nie spyniacca, jaho svajaki i pradstaŭniki tavarystva źviernucca ŭ Kamitet pa pravach čałavieka AAN.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?