Hramadzianskaja kampanija «Naš dom» dabiłasia publikacyi na sajtach šerahu vykankamaŭ miascovych biudžetaŭ i praanalizavała ich pa šerahu pakazčykaŭ. 

Biudžety na 2015 hod byli pryniatyja siesijami miascovych savietaŭ deputataŭ paŭhoda tamu, prajšli jurydyčnuju ekśpiertyzu, atrymali rehistracyjnyja numary i źjavilisia ŭ Nacyjanalnym rejestry pravavych aktaŭ. Ale nie ŭsie vykankamy raźmiaścili ich na sajtach u adkrytym dostupie. Kampanija «Naš dom» jašče ŭ studzieni źviarnułasia da staršyniaŭ i deputataŭ 21-ha miascovaha savieta deputataŭ z prośbaj dać hramadzianam mahčymaść atrymlivać infarmacyju na sajtach vykankamaŭ, uklučajučy biudžety na 2015 hod. 

Jak paviedamiŭ kaardynatar kampanii «Naš dom» Andrej Aksionaŭ, na 11 sajtach miascovych vykankamaŭ źjavilisia haradskija i rajonnyja biudžety na 2015 hod u poŭnym abjomie. 

Aktyvisty hramadzianskaj kampanii praviali manitorynh biudžetaŭ dziesiaci haradoŭ na 2015 hod i paraŭnali ich pa troch pakazčykach: pamiery reziervovych fondaŭ, dachody ad štrafaŭ, utrymańniaŭ, raschody na ŽKH ad ahulnych sum dachodaŭ. 

Tak, pa suadnosinach sumy reziervovaha fondu da ahulnaj sumy dachodaŭ haradskoha biudžetu na 2015 hod jaŭnym lidaram źjaŭlajecca Minsk (0,97%). Biezumoŭnym aŭtsajdaram akazalisia Baranavičy (0,20%). Reziervovy fond Minska — 346.152.026 tys. rubloŭ, dachody haradskoha biudžetu — 35.727.841.086 tys. rubloŭ. 

Pa suadnosinach sumy dachodaŭ ad štrafaŭ i ŭtrymańniaŭ da ahulnaj sumy dachodaŭ haradskoha biudžetu na 2015 hod jaŭnym lidaram źjaŭlajecca Hrodna (1,11%), aŭtsajdaram akazaŭsia Minsk (0,33%). U Hrodnie suma dachodaŭ ad štrafaŭ i ŭtrymańniaŭ — 26.820.407 tysiač rubloŭ, ahulnaja suma dachodaŭ biudžetu — 2.406.118.129 tysiač rubloŭ, u Minsku suma dachodaŭ ad štrafaŭ i ŭtrymańniaŭ — 117.755.663 tys. rubloŭ. 

Pa suadnosinach sumy asobnych raschodaŭ na ŽKH da ahulnaj sumy dachodaŭ haradskoha biudžet na 2015 hod jaŭnym lidaram źjaŭlajecca Brest (16,95%), aŭtsajdaram — Pinsk (1,00%). U Breście asobnyja raschody na ŽKH — 396.419.526 tys. rubloŭ (16,95% ad ahulnaj sumy dachodaŭ biudžetu), u Pinsku — 120.318.677 tys. rubloŭ (dachod biudžetu — 1.203.397.567 tys. rubloŭ). 

Dachody haradskich biudžetaŭ na 2015 hod Homiela, Mahilova, Viciebska, Hrodna, Bresta, Babrujska, Baranavič, Pinska, Navapołacka roŭnyja raschodam. Deficyt biudžetu Minska na 2015 hod składaje 1.573.617.595 tys. rubloŭ (dachody — 35.727.841.086 tys. rubloŭ, raschody — 37.301.458.681 tys. rubloŭ). 

«My pasprabavali azirnuć paviarchoŭnym pozirkam niedaśviedčanaha abyvaciela try artykuły ŭ dziesiaci haradskich biudžetach na 2015 hod. Suchija ličby, zapłanavanyja i zaćvierdžanyja miascovymi deputatami, akazalisia kudy bolš čym krasamoŭnymi. Cikava, a ci razhledzieŭ choć adzin miascovy deputat jaŭna niaroŭnyja ŭmovy?» — prakamientavaŭ Aksionaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?