Pačałosia farmavańnie štaba Ruchu Salidarnaści «Razam» u padtrymku Mikałaja Statkieviča.

Svaju zhodu ačolić štab daŭ viadomy hramadski dziejač, były palitviazień Mikałaj Aŭtuchovič. Pieršym namieśnikam staršyni hetaj struktury budzie viadomy pradprymalnicki lidar, namieśnik staršyni Ruchu Salidarnaści «Razam» Aleś Makajeŭ. Taksama namieśniki staršyni – Jaŭhien Batura i Siarhiej Chanžankoŭ. Pasadu sakratara zaniała Nadzieja Batura. U bližejšyja dni adbudziecca dafarmavańnie štaba i pryznačeńnie kaardynataraŭ pa rehijonach. U koratkaterminovaj pierśpiektyvie da inicyjatyŭnaj hrupy kandydata ŭ prezidenty Mikałaja Statkieviča (jakuju musić farmavać BSDP (Narodnaja Hramada)), maje dałučycca nie mienš 200 siabraŭ i prychilnikaŭ Rucha Salidarnaści «Razam».

Padčas dalejšych dziejańniaŭ štab zasiarodzicca ŭ pracy pa prahramnych metach Ruchu – u baraćbie z etnacydam, u padtrymcy pradprymalnikaŭ i vyzvaleńni palitviaźniaŭ. Taksama budzie pravodzić kaardynacyju akcyj va Ukrainie, dzie najbolš značnyja mierapryjemstvy zapłanavanyja na 7-9 vieraśnia va Lvovie i ŭ Kijevie.

Ruch Salidarnaści «Razam» spadziajecca, što terminovyja dziejańni pa mabilizacyi svaich siabraŭ i prychilnikaŭ zrobiać i inšyja biełaruskija demakratyčnyja arhanizacyi, a ŭ pieršuju čarhu – Małady Front, Biełaruskaja Partyja Svabody i Prahresu, jakija razam z Rucham Salidarnaści «Razam» i BSDP (Narodnaja Hramada) uvachodziać u Jeŭrapiejskuju kaalicyju, lidaram jakoj źjaŭlajecca Mikałaj Statkievič.

U karotkim kamientary pres-słužbie lidar Ruchu Salidarnaści «Razam» Viačasłaŭ Siŭčyk padkreśliŭ: «My praviali razam nie adnu kampaniju ŭ miežach Jeŭrapiejskaj kaalicyi, u toj čas, kali Mikałaj Statkievič byŭ na voli. Na tych samych pryncypach my budujem i hetuju kampaniju, kali jon znachodzicca ŭ turmie. Dla nas vielmi vialiki honar, što kampaniju našaha Ruchu ŭ Biełarusi ačolić Mikałaj Aŭtuchovič, čałaviek, mužnaść jakoha viadoma miljonam biełarusaŭ. Na žal, nie adbyłosia kansalidacyi ŭsioj apazicyi praz vyłučeńnie Mikałaja Statkieviča adzinym kandydatam, tamu treba ciapier uzmacnić našyja vysiłki, kab tuju narodnuju padtrymku, jakuju maje Mikałaj Statkievič za košt svajoj mužnaści, patryjatyzmu i paśladoŭnaści, vyjavić u vyłučeńni jaho jak kandydata na pasadu prezidenta Biełarusi. Hetaj pasady Mikałaj Statkievič, u adroźnieńni ad inšych, varty».

U toj atmaśfiery bieznadziejnaści i biaźvierja, jakaja ciapier naviazvajecca biełaruskamu hramadstvu, tolki vyłučeńnie Mikałaja Statkieviča ŭ jakaści alternatyvy Alaksandra Łukašenki moža abjadnać biełarusaŭ da baraćby za ŭłasny los. Hetaja baraćba, na dumku Viačasłava Siŭčyka, musić iści pad łozunham «Boh. Ajčyna. Honar».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?