U Mahilovie šeść žylcoŭ vysielenaha doma pa vulicy Leninskaj, 59, jakija abjavili haładoŭku z patrabavańniem dać im asobnaje žyllo, praciahvajuć akcyju pratestu.

Haładoŭka była abjaŭlenaja 18 maja. Udzielniki akcyi sprabujuć dakazać, što pražyvali ŭ žyłym domie, a nie ŭ internacie, adkul pa pryčynie staraści pabudovy byli pierasielenyja ŭ internat pa vulicy Pijanierskaj. Jak śćviardžajuć žylcy, u ich na rukach ordery, vydadzienyja ŭ 1970-ch hadach, dzie paznačana, što jany atrymali mienavita kvatery ŭ šmatkvaternym žyłym domie. Haradskija ž ułady ličać, što stary dom byŭ internatam, i tamu asobnych kvater žylcam vydzialać nie treba. Hramadzianie źviarnulisia ŭ abłasnuju prakuraturu i zajavili, što hatovyja abjavić haładoŭku. U sakaviku nahladnaje viedamstva admoviła im u pravie na asobnyja kvatery, staŭšy na bok haradskich uładaŭ. Vysielenyja žylcy, u svaju čarhu, zajavili pra padłoh dakumientaŭ, padman i ihnaravańnie ich pravoŭ. 19 maja da tych, chto haładaje, pryjazdžała chutkaja dapamoha. Mahiloŭskija ŭłady pakul nijak nie adreahavali na haładoŭku.

«Pakul usio bieź źmienaŭ, ale adčuvajecca vialikaja słabaść. Astatnija adčuvajuć siabie hetak ža sama. My tut źbirajemsia, pasiadzim razam, razydziemsia, palažym», — paviedamiła BiełaPAN adna z udzielnic haładoŭki Natalla Kastahładava.

Pavodle jaje słoŭ, miascovyja ŭłady praciahvajuć ihnaravać i akcyju pratestu, i patrabavańni vysielenych žylcoŭ. «Nichto navat nie rabiŭ nijakich sprobaŭ pahutaryć», — zaznačyła Kastahładava. Niahledziačy na heta, pavodle jaje słoŭ, udzielniki haładoŭki nie majuć namieru spyniać akcyju.

Ad pradstaŭnikoŭ mahiloŭskaj ułady jakichści kamientaryjaŭ nakont takoj situacyi pakul nie pastupała.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?