16 maja «Naša Niva» apublikavała list čytača Piatra Bahdanava, jaki aburaŭsia, što z handlovaj placoŭki AliExpress raptoŭna źnikła ŭsia biełaruskaja nacyjanalnaja simvolika.
Adnak chutki pošuk pa sajcie pakazvaje, što ŭsio zastałosia na svaich miescach. Navat «apošniaja» spasyłka, jakuju Bahdanaŭ nazvaŭ niadziejsnaj, vydatna pracuje. Kamientatary ci to ŭ žart, ci to ŭsurjoz pačali budavać teoryi zmovy i źviazali źniknieńnie bieł-čyrvona-biełych ściahoŭ z AliExpress i vizit u Biełaruś staršyni KNR Si Czińpina.
Mabyć, pryčyna «źniknieńnia» nacyjanalnaj biełaruskaj simvoliki z AliExpress — niekarektnyja pošukavyja zapyty.
Naŭrad ci kitajskija vytvorcy tavaraŭ šyrokaha ŭžytku majuć hłybokija viedy pra Biełaruś uvohule, a tym bolš pra jaje histaryčnyja simvały, ich nazvu i pravilnaje napisańnie łacinskim ałfavitam. U lepšym vypadku bieł-čyrvona-bieły ściah nazavuć «old style flag» (ściah staroha stylu).
Tamu zamiest taho, kab hadać z zapytami «pahonia», «pogonia», «pagonya» i inš., lepš prosta šukać tavary pa zapycie «belarus». Pošuk pa naźvie krainy ŭ lubym vypadku vydaść usie tavary, źviazanyja z hetaj krainaj.
Tak, u vynikach pošuku budzie šmat lišnich tavaraŭ kštałtu GPS-navihataraŭ z kartami Biełarusi, adnak pa zapycie «belarus» samaja papularnaja ŭ Biełarusi internet-kramie možna spakojna znajści i nabyć i bieł-čyrvona-bieły ściah, i BČB-ściah z pahoniaj, i znački, i našyŭki.