Prezident Ukrainy Piatro Parašenka, vystupajučy z pramovaj z nahody Dnia pamiaci achviaraŭ palityčnych represij, nazvaŭ HPU i NKVD rodnasnymi strukturami z hiestapa i SS.
«Čuma - jana i jość čuma, niezaležna ad taho, karyčnievaja jana ci čyrvonaja!» - skazaŭ Parašenka, naviedvajučy Nacyjanalny historyka-miemaryjalny zapaviednik «Bykaŭnianskija mahiły».
Parašenka nahadaŭ, što padpisaŭ zakon ab zabaronie kamunistyčnaj simvoliki, i zaklikaŭ «ačyścić Ukrainu ad simvałaŭ režymu, jaki źniščyŭ miljony niavinnych ludziej».
«Bykaŭnianskija mahiły - najbolš žyvy śviedka kamunistyčnaha teroru, najbolš nieabvieržny dokaz złačynstva suprać čałaviectva, takoha ž maštabnaha, jak tyja, što ździejśnienyja ŭ Katyni, Aśviencymie, Buchienvaldzie, Babinym Jary, na Sałaŭkach. Niaŭžo nie pryjšoŭ čas kančatkova ačyścić Ukrainu ad simvałaŭ režymu, jaki źniščyŭ miljony niavinnych ludziej?!» - skazaŭ Parašenka.
U krasaviku 2015 Viarchoŭnaja Rada Ukrainy pryniała zakon, jaki zabaraniaje simvoliku nacysckaha i kamunistyčnaha režymaŭ, a taksama zakon ab raskryćci archivaŭ represiŭnych orhanaŭ kamunistyčnaha režymu, jakija dziejničali na terytoryi Ukrainy. Akramia taho, deputaty pryznali Ukrainskuju paŭstanckuju armiju i Arhanizacyju ŭkrainskich nacyjanalistaŭ baraćbitami za niezaležnaść krainy. Hetyja zakony byli padpisany Piatrom Parašenkam 15 traŭnia.
Bykaŭnianskija mahiły - miesca rasstrełu i pachavańnia tysiač asudžanych u miežach Kijeva. Pachavańni byli vyjaŭlenyja ŭ 1962 hodzie, adnak doŭhi čas aficyjnaja viersija abviaščała, što tam pachavanyja achviary nacysckaha režymu. Tolki ŭ 1989 hodzie ŭłada pryznała, što heta pachavańnia achviar stalinskich represij.
