Litva źviarnułasia da susiedniaj Łatvii z prośbaj dapamahčy ŭ pošukach źnikłaha 16 maja nad Bałtyjskim moram samalota An-2. Pra heta paviedamiŭ pres-ataše vajenna-marskich sił Litvy kapitan-lejtenant Antanas Brencius.
«Rajon biespaśpiachovaha pakul pošuku pryjšłosia pašyryć da miežaŭ zony adkaznaści kaardynacyjna-vyratavalnaha centra Łatvii, tamu my paprasili susiedziaŭ dałučycca da apieracyi», - rastłumačyŭ jon. Pa źviestkach Brenciusa, łatvijskija kalehi nakiravali ŭ zonu pošuku viertalot.
Źnikły bort z učorašniaha dnia šukajuć dva karabla VMS i viertalot VPS Litvy. Siońnia, 17 maja, da ich dałučyŭsia vajskovy samalot.
Samalot hramadzianskaj kampanii Klaipiedos avialinijos lacieŭ u Litvu z šviedskaha Hioteborha. Tam An-2, vyrableny ŭ 1981 hodzie, prachodziŭ prafiłaktyčny ramont. Na borcie źnikłaha samalota znachodzilisia dva lotčyki, jakich avijatary, što ich viedajuć, charaktaryzujuć jak samych daśviedčanych u Litvie piłotaŭ mašyn takoha kłasa. Pasažyraŭ na borcie nie było.
Samalot źnik z ekranaŭ sačeńnia 16 maja nieŭzabavie paśla taho, jak uvajšoŭ u litoŭskuju zonu kiravańnia pavietranaj prastoraj i pravioŭ radyjoseans ź ziamloj. U hety čas jon mierkavana byŭ za 97 marskich milach ad litoŭskaha aeraporta Pałanha.
