Padatkovyja orhany znoŭ prapanoŭvajuć minčukam paviedamlać pra nielehalnych kvaterazdatčykaŭ. Heta praduhledžana zapłanavanaj na červień akcyjaj «Zdaješ kvateru — zapłaci lehalna padatki», paviedamiła 14 maja žurnalistam namieśnik načalnika inśpiekcyi Ministerstva pa padatkach i zborach pa Minsku Halina Hurynovič.
Pavodle jaje słoŭ, miarkujecca, što na praciahu adnaho tydnia červienia hramadzianie zmohuć paviedamlać na śpiecyjalnuju telefonnuju liniju infarmacyju pra asob, jakija zdajuć kvateru nielehalna. Dakładnyja terminy akcyi jašče nie vyznačanyja, chutčej za ŭsio, heta budzie druhaja dekada miesiaca.
Jak adznačyła namieśnik načalnika inśpiekcyi, anałahičnaja akcyja była praviedziena padatkovymi orhanami ŭ 2013 hodzie i «dała vielmi dobryja vyniki».
Ciapier u Minsku lehalna zdajuć kvatery ŭ arendu 46,5 tysiačy čałaviek. «Katehoryja hetych hramadzian pastajanna raście, z 1 maja 2014 hoda ich kolkaść pavialičyłasia na 4 tysiačy čałaviek», — skazała Halina Hurynovič.
Pavodle jaje mierkavańnia, svaju rolu tut adyhryvaje infarmacyjna-tłumačalnaja praca. Tak, u kožnym raźlikova-daviedačnym centry Minska znachodzicca kutok kvaterazdatčyka ci jość infarmacyjnaja papka, dzie jość mahčymaść aznajomicca z zakanadaŭčymi aktami pa pytańni zdačy žylla ŭ arendu.
Pravierki kvaterazdatčykaŭ pravodziacca rehularna, u 2015 hodzie ich było arhanizavana ŭžo 318. «Vynikovaść takich pravierak 100-pracentnaja», — padkreśliła namieśnik načalnika inśpiekcyi Ministerstva pa padatkach i zborach pa Minsku.
