U čaćvier u Rastovie-na-Donie (Rasija) praviali parad «dziciačych vojskaŭ». Mierapryjemstva stała ŭžo šostym pa liku, ale rasijskaja błohaśfiera daviedałasia padrabiaznaści tolki sioleta i adreahavała žorstkaj krytykaj.
Mierapryjemstva ŭ Rastovie pravodziłasia pa inicyjatyvie kiraŭnika administracyi horada Siarhieja Harbaniova i pry padtrymcy ministerstva abarony.
U paradzie pryniali ŭdzieł niekalki sotniaŭ dziaciej va ŭzroście ad 4 da 10 hadoŭ. Da ŭračystaściaŭ, jak nazyvajuć mierapryjemstva ŭ ministerstvie abarony, dla ŭdzielnikaŭ paradu śpiecyjalna padrychtavali vajskovuju formu roznych vidaŭ i rodaŭ vojskaŭ.
Navučency miascovaj himnazii vystupili ŭ roli desantnych vojskaŭ, vychavancy dziciačych sadoŭ — u roli hvardziejskich raźviedčykaŭ, pavietrana-desantnych vojskaŭ i bataljona achovy štaba Paŭdniovaj vajskovaj akruhi. «Na plac vyjduć dzieci z mnohich inšych adukacyjnych ustanoŭ», — paviedamlałasia pierad mierapryjemstvam na sajcie haradskoj administracyi.
Kožnaje «padraździaleńnie» paradnaha raźliku prademanstravała svoj ściah, deviz, pieśniu i ŭračysta prajšło pierad vieteranami Vialikaj Ajčynnaj vajny, paviedamili ŭ pres-słužbie.
U svaju čarhu, u ministerstvie abarony mierapryjemstva nazvali «kranalnym». «Uvohule, usio pa-darosłamu: i parad, i vajskovy arkiestr, i sapraŭdny hienierał-pałkoŭnik — kamandujučy vojskami akruhi», — zaklučyli ŭ viedamstvie.
