Małady čałaviek zvaliŭsia z dachu doma, jaki budujecca pa vulicy Bahuševiča ŭ mikrarajonie Alšanka ŭ sieradu, 13 maja, kala 12:00. Chutkuju vyklikaŭ vypadkovy śviedka.
s13.ru
Chłopiec pamior da taho, jak paśpieli pryjechać miedyki.
«Śledstva ŭstanaŭlivaje pryčynu śmierci, pryznačanyja adpaviednyja ekśpiertyzy», — paviedamiŭ aficyjny pradstaŭnik USK pa Hrodzienskaj vobłaści Siarhiej Šaršanievič.
Pavodle jaho słoŭ, pra matyvy ŭčynku i pra toje, było heta samahubstva ci niaščasny vypadak, kazać pakul rana.
Zahinuły rodam ź Pinska, ale ŭžo niekatory čas žyŭ u Hrodnie. Lubiŭ sport: aktyŭna zaŭzieŭ za FK «Nioman», u svoj čas zajmaŭsia boksam. U jaho zastałasia žonka i adnahadovaja dačka.
Apošni čałaviek, ź jakim chłopiec bačyŭsia i razmaŭlaŭ pa telefonie niepasredna pierad padzieńniem z dachu, — 18-hadovaja dziaŭčyna, ź jakoj jon sustrakaŭsia jašče da viasiella.
Pavodle jaje słoŭ, małady čałaviek chacieŭ raźvieścisia z žonkaj, a joj navat paśpieŭ padaryć piarścionak: «My byli znajomyja amal 2,5 hoda. Ja chacieła, kab jon byŭ ź siamjoj, a jon kazaŭ, što nie budzie bieź mianie žyć, što jamu patrebna tolki ja i jaho dačka. U apošni čas jon naohuł dumaŭ źjechać ź Biełarusi».
Pra toje, što zahinuły płanavaŭ razvod, kažuć i niekatoryja jaho siabry. Žonka chłopca na našy pytańni nie adkazała, ale ŭ statusie na staroncy ŭ sacsietcy napisała: «Jaho bolš niama, ale ja ŭsio roŭna jaho kachaju» i «Viedaj, ja zaŭsiody ciabie budu kachać».
