U 2014 hodzie ŭ Biełarusi naradziłasia rekordnaja kolkaść dziaciej za apošnija 20 hadoŭ — 118,5 tysiačy, paviedamiła namieśnik načalnika adździeła narodanasielnictva, hiendarnaj i siamiejnaj palityki Ministerstva pracy i sacyjalnaj abarony Maryna Arciomienka 13 maja na pres-kanfierencyi ŭ Minsku, pryśviečanaj Dniu siamji (15 maja).
U pieršym kvartale 2015 hoda ŭ krainie naradzilisia 27,8 tysiačy dziaciej, na 122 bolš, čym u anałahičnym letašnim pieryjadzie, zaznačyła Arciomienka. Pavodle jaje słoŭ, u apošnija hady ŭ krainie źmianiajecca madel naradžalnaści, maładyja siamiejnyja pary ŭsio čaściej adkładvajuć naradžeńnie dziaciej na bolš poźni etap.
«Naša kraina nie maje vialikich pryrodnych bahaćciaŭ, tamu asnoŭny naš resurs — heta čałaviečy patencyjał, asnova jakoha zakładvajecca ŭ siamji, — skazała jana. — Ad dabrabytu siamji i ad taho, nakolki jana siońnia vykonvaje svaje funkcyi, u mnohim zaležyć i ekanomika, i dabrabyt, adukacyja i maralnaść dziaržavy».
Pavodle źviestak pierapisu nasielnictva 2009 hoda, u krainie žyvuć prykładna 2,7 młn. siemjaŭ, ź jakich 1,2 młn. (amal 45%) majuć dziaciej da 18 hadoŭ.
«Kab stvaryć i padtrymlivać u krainie spryjalnaje stanovišča dla pavyšeńnia naradžalnaści, dziaržava pastajanna pašyraje pieralik sacyjalna-ekanamičnych prahram, — praciahnuła Arciomienka. — Demahrafičnaja nahruzka ŭ Biełarusi pastajanna ŭzrastaje, uličvajučy vialiki pracent stareńnia nasielnictva (14%), i na 1.000 čałaviek pracazdolnaha ŭzrostu siońnia prypadaje 705 čałaviek małodšaha i starejšaha ŭzrostu. Adnačasova źnižajecca kolkaść žančyn repraduktyŭnaha ŭzrostu. Jość prahnozy Navukova-daśledčaha ekanamičnaha instytuta Ministerstva ekanomiki Biełarusi, pa jakich da 2030 hoda kolkaść žančyn repraduktyŭnaha ŭzrostu ad 15 da 49 hadoŭ źmienšycca bolš čym na 264 tysiačy. Adpaviedna heta viadzie da skaračeńnia kolkaści naradžeńnia dziaciej».
Na 1 studzienia 2015 hoda kolkaść nasielnictva Biełarusi skłała 9 młn. 480,9 tys. čałaviek, ź ich 4 młn. 409,2 tys. mužčyn i 5 młn. 71,7 tys. žančyn. Na 1.000 mužčyn prypadaje 1.150 žančyn (siarod haradskoha nasielnictva — 1.167, siarod sielskaha — 1.095).
Pavodle słoŭ Arciomienki, kali ŭ 2000 hodzie žančyny ŭpieršyniu brali šlub u 22,8 hoda, mužčyny ŭ 25 hadoŭ, to letaś siaredni ŭzrost žančyn, jakija ŭziali pieršy šlub, składaŭ 25,3 hoda, mužčyn — 27,4 hoda».
Nazirajecca źnižeńnie kolkaści skasavanych šlubaŭ pry adnačasovym źnižeńni kolkaści zarehistravanych šlubaŭ. U 2014 hodzie kolkaść šlubaŭ skłała 83,9 tysiačy (u 2013 hodzie — 87,1 tysiačy), a skasavańniaŭ 34,9 tysiačy (u 2013 hodzie — 36,1 tysiačy).
