Šeść deputataŭ Jeŭraparłamienta ŭvajšli ŭ niefarmalnuju hrupu apiekunoŭ biełaruskich palitviaźniaŭ, paviedamiła Maryna Adamovič, žonka palityka Mikałaja Statkieviča, jaki znachodzicca ŭ mahiloŭskaj turmie.
«Kožnamu ź biełaruskich palitviaźniaŭ, jakich takimi vyznačajuć našy pravaabaroncy, znajšoŭsia svoj apiakun siarod jeŭraparłamientaryjaŭ», — skazała Adamovič, zaznačyŭšy, što stvareńnie hrupy 12 maja «źjaŭlajecca aktam salidarnaści i jarkim paćviardžeńniem taho, što biełaruskija palitviaźni nie zabytyja i tema parušeńniaŭ pravoŭ čałavieka ŭ Biełarusi taksama nie zabytaja ŭ Jeŭraparłamiencie, niahledziačy na hieapalityčnyja ŭzrušeńni».
Pavodle jaje słoŭ, jeŭradeputaty buduć sačyć za losam apanientaŭ biełaruskaj ułady, jakija znachodziacca ŭ źniavoleńni, dziejničać u ich abaronu i padtrymku.
Adamovič nahadała, što ŭ minułym składzie Jeŭraparłamienta ŭžo isnavała takaja hrupa, dzie najbolšuju aktyŭnaść prajaŭlali deputaty Marak Mihalski i Mary-Łuizie Biek. «My im pa siońniašni dzień udziačnyja», — skazała jana.
Novaja hrupa stvoranaja ź inicyjatyvy pravaabarončaj arhanizacyi Freedom House i jeŭradeputata ad Litvy Piatrasa Aŭštravičusa. U jaje ŭvajšli pradstaŭniki samych roznych frakcyj Jeŭrapiejskaha parłamienta, uklučajučy najbujniejšyja — kansiervatyŭnuju Jeŭrapiejskuju narodnuju partyju (JERR) i sacyjał-demakratyčny Prahresiŭny aljans sacyjalistaŭ i demakrataŭ (S&D).
Nakolki aktyŭna budzie pracavać hrupa, pakul ciažka skazać, zaznačyła žonka źniavolenaha palityka, bo heta zaležyć ad aktyŭnaści kožnaha ź jaje členaŭ. Pieršym krokam jeŭradeputataŭ stała simvaličnaja akcyja salidarnaści — adpraŭka paštovak na adras palitviaźniaŭ sa słovami padtrymki.
