Biełaruskaja čyhunka spraściła apłatu kvitkoŭ bankaŭskimi płaciežnymi kartkami praź internet, paviedamili ŭ pres-słužbie BČ.
fota Julii Balcevič
Ukaraniony novy servis One Click («Adzin klik»). Raniej pry apłacie kvitkoŭ na sajcie poezd.rw.by z dapamohaj bankaŭskaj kartki patrebna było kožny raz uručnuju ŭvodzić usie poŭnyja źviestki. Ciapier paśla ažyćciaŭleńnia troch paśpiachovych płaciažoŭ z hetaha sajta servis One Click dazvolić u dalejšym pry apłacie ŭkazvać tolki achoŭny kod, jaki znachodzicca z advarotnaha boku kartki (CVS2/CVV).
Čas praviadzieńnia płaciažu skaračajecca da niekalkich siekund — usie nieabchodnyja rekvizity servis One Click ukaža aŭtamatyčna.
Jak zaznačyła pres-słužba, spraščeńnie pracedury apłaty bankaŭskaj kartkaj nie źnizić uzrovień biaśpieki takich apieracyj — servis One Click siertyfikavany pa standartach biaśpieki PCI DSS i całkam adpaviadaje patrabavańniam mižnarodnych płaciežnych sistem Visa i MasterCard, a taksama nacyjanalnaj płaciežnaj sistemy «Biełkart».
Letaś na sajcie poezd.rw.by było aformlena bolš za 1 miljon prajaznych dakumientaŭ. «Papularnaść kupli kvitkoŭ praź internet na sajcie Biełaruskaj čyhunki praciahvaje ŭzrastać», — zaznačyła pres-słužba. Tolki ŭ krasaviku 2015 hoda praź internet było aformlena bolš za 127 tysiač prajaznych dakumientaŭ — u 1,6 razu bolš, čym u krasaviku 2014 hoda. Ciapier kožny dziasiaty kvitok na pasažyrskija ciahniki nabyvajecca na sajcie poezd.rw.by Biełaruskaj čyhunki.
