Vypusknik Akademii mastactvaŭ Micia Piślak choča namalavać tvor Ivana Chruckaha «Partret žonki z kvietkami i sadavinoj» na ścianie žyłoha doma 25 pa vulicy Karła Marksa. Na raboty pa padrychtoŭcy ściany, a taksama farby i budaŭničyja ryštavańni jamu treba 32 miljony. Kab sabrać hrošy, mastak raźmiaściŭ svoj prajekt na kraŭndfandynhavaj placoŭcy ulej.by.
Za 2 tydni Piślaku ŭdałosia sabrać 12% ad nieabchodnaj summy. Na karcinu skinułasia navat žycharka taho samaha doma, dzie musić źjavicca tvor, raspaviadaje Micia Piślak.
Micia Piślak: «Ja hetuju ścienku daŭno pryhledzieŭ i chacieŭ jaje aformić. Da taho ž, poruč — Mastacki muziej. Administracyja rajona, kudy ja źviartaŭsia vosieńniu, była radaja takoj inicyjatyvie. Ja vybiraŭ, jakoha mastaka ŭziać, ale karciny Ivana Chruckaha dobra kładucca na maju čorna-biełuju hrafiku. Adna žančyna z hetaha domu dała miljon na prajekt».
Pry hetym kalehi z mastackaha asiarodździa ŭžo paśpieli vykazać svaje sumnievy ŭ hetym prajekcie, dadaje Micia Piślak.
Piślak: «Jany pratestujuć, kažuć, što praca nie ŭ temu. Hałoŭny arhumient, što ja niedastatkova viadomy, kab razmaloŭvać štości ŭ centry horada».
Pracy Mici Piślaka siońnia ŭžo možna pabačyć u niekatorych rajonach horada. Namalavać hetuju pracu jon płanuje sioleta z 1 lipienia pa 1 žniŭnia. Potym mastak choča pašyrać prajekt «Karcina na ścianie» na inšyja harady: Kijeŭ, Bierlin, Paryž, Miłan, Barsiełona, Ńju-Jork. U hetych haradach jon płanuje namalavać tvory mastakoŭ, jakija tam žyli i pracavali.
