Finał «Jeŭrabačańnia» projdzie 23 maja ŭ Vienie. Užo siońnia možna nazvać pieśni, što zacikaviać jak biełarusaŭ, tak i ŭsiu Jeŭropu.
Biełaruski duet Uzari & Maimuna užo adpraviŭsia ŭ Vienu, dzie ŭ pieršym paŭfinale 19 maja vykanaje pieśniu «Time». Staŭki na pieramohu Biełarusi zusim nievysokija (tolki 16 miesca ŭ bukmiekieraŭ), zatoje sukienka ŭ Majmuny pryhožaja, ź niečym padobnym da nacyjanalnych matyvaŭ.
Čyje jašče pieśni na «Jeŭrabačańni» varta nie prapuścić?
Pavodle stavak na bukmiekierskich sajtach, absalutnym favarytam konkursu ŭ hetym hodzie jość Šviecyja — jaje pradstavić Mons Ziełmierloŭ ź pieśniaj «Heroes».
Syn chirurha i prafiesarki Łunskaha univiersiteta, Zielmierloŭ atrymaŭ słavu ŭ Šviecyi ŭ 2005 hodzie, kali ŭziaŭ udzieł u miascovym konkursie «Idol» (tamtejšaja «Fabryka Zorak»). Jon staŭ papularnym, choć u konkursie zaniaŭ tolki piataje miesca. U 2006 hodzie jon pieramoh u šviedskim konkursie «Let's Dance», zatym u 2007 i 2009 hodzie biŭsia za pieramohu ŭ Melodifestivalen — konkursie, pa vynikach jakoha adbirajucca ŭdzielniki «Jeŭrabačańnia» ad Šviecyi.
Uziać pieršaje miesca ŭ Melodifestivalen jon zdoleŭ u 2015 hodzie. Pieramožnaja pieśnia «Heroes» 10 tydniaŭ trymajecca ŭ šviedskich čartach, dva tydni praviała na pieršym miescy. Jana pad kantry-matyvy, što pierachodziać u dyska, raspaviadaje historyju čałavieka, jaki nie moh vypravić toje, što narabiŭ, ale pačuŭ zaklik vycierci ślozy i «žyć, niby zaŭtra nie budzie». «My hieroi našaha času, ale my tančym z demanami ŭ hałovach», — śpiavajecca ŭ prypievie.
Śledam za Šviecyjaj idzie Italija z saładžavymi chipstarami Il Volo i ich italjanamoŭnaj pieśniaj «Grande amore». Kinamany lohka paznajuć u klipie filmy «Pryvid», «Čałaviek-pavuk» i «Nazad u budučyniu».
Siarod favarytaŭ konkursu i blizkija susiedzi Biełarusi — estonski duet Eliny Born i Styha Rasta z dramatyčnaj anhłamoŭnaj «Goodbye to Yesterday». Pa mierkach «Jeŭrabačańnia», klip na pieśniu — praktyčna tryler (kali nie zhadvać Lordi).
Upieršyniu (i, mahčyma, u apošni raz) ŭ «Jeŭrabačańni», jeŭrapiejskim konkursie pieśni, voźmie ŭdzieł inšy kantynient — Aŭstralija. Taki chod tłumačycca jubilejem konkursu — u 2015-m hodzie jon projdzie ŭ 60-y raz. Aŭstraliju adrazu ŭ finale pradstavić Haj Siebaśćian ź pieśniaj «Tonight Again». Šancy Aŭstralii aceńvajuć jak nie horšyja za Estoniju.
Finlandyju na «Jeŭrabačańni» pradstavić hurt Pertti Kurikan Nimipäivät, što ź vialikim adryvam pieramoh u nacyjanalnym adbory. Muzyki hurtu chvoryja na sindrom Daŭna, ich pieśnia «Aina mun pitää» raspaviadaje pra niaspynny cisk, što adčuvajuć na sabie ludzi z abmiežavanymi mahčymaściami — jany zaŭsiody niekamu niešta pavinny, im zaŭsiody niešta nielha. Pieśnia nadzvyčaj karotkaja — tolki paŭtary chviliny. Ale hetyja paŭtary chviliny vyvodziać Finlandyju ŭ piaciorku favarytaŭ konkursu.
Rasija, jakoj biełarusy tradycyjna dajuć vysokija bały ŭ hałasavańni, budzie pradstaŭlenaja na «Jeŭrabačańni» pieśniaj Paliny Haharynaj «A million voices». Palina praviała dziacinstva ŭ Hrecyi, ale paśla śmierci baćki pierajechała da babuli ŭ Sarataŭ. Na rasijskaj scenie zajaviła pra siabie ŭ «Fabrycy zorak-2» u 2003 hodzie. Što cikava, jana ŭ 2011 hodzie ŭ jakaści zaprošanaj zorki brała ŭdzieł va ŭkrainskim šou «Narodna zirka-4», dzie duetam z adesitam Michaiłam Dzimavym zaniała druhoje miesca. Šancy na pieramohu ŭ Paliny nie samyja vysokija, ale ŭ top-5 jana chutčej za ŭsio trapić. I nie, u jaje klipie na pieśniu dla «Jeŭrabačańnia» nie rekłamujecca pradukcyja Apple, chacia stylistyka padobnaja.
Na Leanoru Andrade, ŭdzielnicu ad Partuhalii, varta źviarnuć uvahu z prostaj pryčyny — jana absalutny aŭtsajdar konkursu. Kaeficyjenty stavak na jaje pieramohu vahajucca ad 100/1 da 949/1. Usio praŭda tak drenna?
