Jak minimum 14 słužboŭcaŭ elitnaj Kantemiraŭskaj dyvizii rasijskaj armii pakinuli słužbu, kab bolš nie vajavać suprać Ukrainy, paviedamiŭ adzin z byłych žaŭnieraŭ infarmacyjnamu ahienctvu Reuters.
Kolkaść dokazaŭ udziełu rasijskich vajskoŭcaŭ u vajnie suprać Ukrainy zaškalvaje, na palach bajoŭ rehularna znachodzicca ŭzbrajeńnie rasijskaj vytvorčaści, sałdaty traplali va ŭkrainski pałon, ukrainskija pałonnyja taksama śviedčyli, što byli ŭziatyja ŭ pałon bajcami rasijskaj armii.
Karespandentka maskoŭskaj redakcyi Reuters Maryja Ćviatkova, jakaja amal hod praviała na Danbasie i ŭ susiednich rajonach Rasii, sabrała śviedčańni rasijskich žaŭnieraŭ, ichnych svajakoŭ, a taksama kamientary pravaabaroncaŭ i rasijskich aficeraŭ, kab zrabić śpiecyjalny repartaž na temu nielehalnaha ŭdzieła rasiejskaj armii ŭ vajnie suprać Ukrainy.
Usiaho žurnalistka źviazałasia z 5 byłymi vajskoŭcami, jakija niadaŭna zvolnilisia sa słužby, ale prosiać nie nazyvać ichnych imionaŭ, kab paźbiehnuć niepryjemnaściaŭ.
Adzin z sałdataŭ žyvie ŭ Maskvie, jon raspavioŭ, što letam minułaha hodu byŭ nakiravany ŭ Rastoŭskuju vobłaść RF na vučeńni, adnak zamiest hetaha apynuŭsia ŭ składzie kałony braniatechniki va Ukrainie na tankie.
«Niejki padpałkoŭnik užo paśla pierasiačeńnia miažy raspavioŭ, što mohuć pasadzić za nievykanańnie zahadu. Niekatoryja stali admaŭlacca tam dalej znachodzicca», — kaža były vajskoviec z Kantemiraŭskaj dyvizii.
Rasijskija pałonnyja, jakich zachapili ŭ kancy žniŭnia 2014 hodu ŭ rajonie Iłavajska.
Jon bačyŭ, jak žaŭniery admaŭlalisia vajavać.
«Pry mnie takich było dvoje. Ich kudyści zabrali. Padpałkoŭnik kazaŭ, što na ich zaviali kryminalnuju spravu, a na samoj spravie my im potym telefanavali, jany doma byli, prosta zvolnilisia», — dadaje jon.
Były tankist z Maskvy kaža, što nie pajechaŭ b va Ukrainu pa ŭłasnym žadańni.
«Dy nie, navošta? Heta nie naša vajna. Kab tam vojski byli aficyjna, to tak, heta była b inšaja sprava». Pa jahonych słovach, jon byŭ va Ukrainie ŭ kancy žniŭnia 2014 hoda ŭ składzie ekipaža tanka T-72B3.
«[Paśla viartańnia ŭ Rasiju] pašychtavali nas, skazali — usim kamandzirovačnyja, bajavyja, miedali», — kaža były žaŭnier. Adnak nichto ničoha nie atrymaŭ.
«Vyrašyli zvolnicca. Nas było 14 čałaviek», — zaklučaje jon.
Imiony 9 žaŭnieraŭ, jakija pakinuli Kantemiraŭskuju dyviziju, zhadvalisia ŭ listavańni načalnika adździeła kadraŭ Zachodniaj vajskovaj akruhi RF Viktara Miskaŭca z sakratarom Sajuza kamitetaŭ sałdackich maci Valancinaj Mielnikavaj. Jany byli zvolnienyja, zhodna z adkazam Miskaŭca, 12 śniežnia 2014 hoda.
Troje žaŭnieraŭ z hetaha śpisu, ź jakimi źviazaŭsia Reuters, paćvierdzili, što niadaŭna zvolnilisia z armii, adnak admovilisia razmaŭlać pra padziei va Ukrainie. Pradstaŭnik Minabarony RF admoviŭsia kamentavać adpraŭku ŭ Ukrainu i zvalnieńni vajskoŭcaŭ-kantemiraŭcaŭ.
Inšamu žaŭnieru, jaki syšoŭ sa słužby z-za Ukrainy, 21 hod, i jon kamandvaŭ raźlikam reaktyŭnaj sistemy załpavaha ahnia «Hrad». Vajskoviec prasiŭ nie raskryvać jahonaje imia i nazvu vajennaj častki.
Letam 2014 hoda jahonaja mašyna była ŭ Rastoŭskaj vobłaści prykładna za 2 km ad miažy z Ukrainaj, raspavioŭ jon.
«Jechali biez apaznavalnych znakaŭ. Źniali ŭsie kukardy, piatlicy, šaŭrony. Usio heta pryniali. [Nam] skazali, što ŭ palavych umovach usie chodziać biez hetaha», — kaža były žaŭnier.
U pačatku vieraśnia bajavy raźlik atrymaŭ zahad adkryć ahoń pa celi ŭ 17 km, vierahodna, va Ukrainie.
«Ja spadziavaŭsia, što heta nie pa žyvych ludziach było. Ci što ja ŭ krajnim vypadku pramachnuŭsia».
Ad svaich sasłužboŭcaŭ jon daviedaŭsia, što inšaja batareja ź jahonaj častki pierajšła miažu i była na ŭkrainskaj terytoryi 10 dzion.
U kancy studzienia 2015 hodu jaho terminova vyklikali z adpačynku, kab znoŭ jechać u Rastoŭskuju obłaść. «Skazali, što tam buduć maštabnyja vučeńni ź vielmi vialikaj hrupoŭkaj vojskaŭ», - raspavioŭ jon, adnak nie było sumnivu, što heta źviazana z vajnoj suprać Ukrainy.
Prykładna tady pačaŭsia doŭhi i kryvavy dla abodvuch bakoŭ nastup prarasijskich bajevikoŭ pad Debalcava.
Vajskoviec i jašče čatyry žaŭniery vyrašyli, što lepiej zvolnicca z armii, čym pajechać vajavać va Ukrainu. Dakumanty vajennaj prakuratury śviedčać, što praceduru zvalnieńnia jany skončyli ŭ sakaviku.
