Śviet pabačyła najnoŭšaja raspracoŭka rasijskaj abaronnaj pramysłovaści — tank 5-ha pakaleńnia T-14 «Armata», jaki pa zajaŭlenych charaktarystykach pieraŭzychodzić amal usie anałahi ŭ śviecie.

Adnak pakul rasijskija ŚMI zachaplajucca novaj bajavoj mašynaj, jaje ŭvieś čas pieraśledujuć roznyja kazusy — to tank prosta zahłuchnie, to błohiery ŭbačać detali, jakija hnucca na vietry. Kab razabracca ŭ «Armacie», «Naša Niva» pahutaryła z vajennym ekśpiertam Alaksandram Alesinym.

«NN»: Alaksandr, ci padzialajecie vy skiepsis niekatorych ekśpiertaŭ datyčna bajazdolnaści «Armaty»? Bo, paśla niadaŭnich incydentaŭ z tankam niekatoryja pačali śćviardžać, što heta tolki «Paciomkinskaja vioska» na husienicach.

— Viedajecie, nie. U siońniašnich realijach mnohim, asabliva z antyrasijskaha łahiera, kryŭdna ŭśviedamlać, što ŭ Rasii źjaviłasia takaja zbroja. Mienavita z hetaha boku i dźmie viecier niedavieru.

Bo ŭkraincy, naprykład, razumiejuć, što ich novyja «Apłoty» i «Jatahany» — nie kankurenty rasijskaj «Armacie». «Leapardy» i «Abramsy» taksama ŭžo vyčarpali svoj patencyjał madernizacyi.

Tamu, pa sutnaści, tvareńnie «Urałvahonzavoda» abnulaje raspracoŭki zamiežnych pradpryjemstvaŭ, jakija taksama bjucca ŭ pošuku novych rašeńniaŭ. A što da fota błohieraŭ — dyk mnie zdajecca, što heta fejk.

NN: Dyk u čym hienijalnaść tanka?

— Miarkujcie sami — u «Armaty» niežyłaja vieža. Heta dazvalaje bolš jakasna zabraniravać tank i lepš abaranić ekipaž, jaki znachodzicca ŭ tytanavaj kapsule za piaredniaj branioj. Tytanavaja kapsuła — heta ŭvohule toje, čaho raniej nie było nidzie, heta hałoŭnaje dasiahnieńnie stvaralnikaŭ.

Pałomka na Krasnaj płoščy.

Pałomka na Krasnaj płoščy.

Savieckija kanstruktary ŭvohule tankistaŭ nie škadavali, ale ciapier bajavy kamplekt vynieśli z-pad noh ekipaža, što taksama pavyšaje šancy tankistaŭ na vyžyvańnie ŭ vypadku detanacyi ŭłasnych snaradaŭ. Taksama raspracoŭščyki abiacajuć radar samalotnaha typu, jaki budzie šukać nakiravanyja ŭ tank rakiety ci snarady, potym ich musiać źbivać inšyja sistemy.

«Armata» prosta našpihavanaja roznaha kštałtu elektronikaj, usiaho nie pieraličyš: heta i kamiery dla 360-hradusnaha ahladu pola boju, i infračyrvonyja sistemy, i raspaznavańnie «svoj-čužy».

Akramia taho, ja baču plus u vyniesienaj u niežyłuju viežu harmacie — heta pazbaŭlaje ekipaž ad parachavych hazaŭ, ad ich, darečy, na vučeńniach časam čadzieli cełyja ekipažy starych tankaŭ.

«NN»: Dyk vam nasamreč zdajecca, što «Armata» – najlepšy tank u śviecie? Jak ža tady ź im vajavać?

— Nakont najlepšaha tanka — heta chutčej avans tym idejam, jakija ŭ jaho zakładzienyja. Ale patrebnyja jašče vyprabavańni, dośvied ekspłuatacyi. Časta byvaje tak, što zajaŭlena adno, a pa vynikach – aby-što. Šmat zaležyć i ad ekipaža.

Mahu tolki skazać, što kali ŭ sieryjnuju vytvorčaść zapuściać mienavita toj tank, jaki zajaŭleny, to vajavać ź im budzie dosyć ciažka. Niejkija šancy jość u «Abramsaŭ» i «Leapardaŭ» za košt brani sa źbiadniełaha ŭranu. A voś u nas šancaŭ niama nijakich — samy bajazdolny biełaruski tank — heta T-72BM 1985 hoda vypusku. Chaj i madyfikavany, ale ŭsio roŭna. Tearetyčna, našy ŭzbrojenyja siły zdolejuć padbić «Armatu», kali taja vydatkuje ŭsiu svaju aktyŭnuju abaronu na naš intensiŭny abstreł i na jaje zvalicca bomba albo prylacić padkalibierny snarad. Inšych šlachoŭ ja nie baču. Bo snarady aktualnych na siońnia PZRK laciać adnosna pavolna, i «Armata» ich lohka sabje pry padlocie. Abarona «Armaty» pad heta i zatočanaja.

«NN»: Ci jość u Biełarusi šaniec uziać hety tank na ŭzbrajeńnie?

— Heta sprava dziesiacihodździaŭ. U nas navat T-90 jašče niama nivodnaha. Tamu havaryć ab hetym rana. Rasija sama płanuje pieraŭzbroicca tolki da 2020 hoda, tamu małajmavierna, što ŭ nas štości źjavicca raniej ci ŭvohule źjavicca.

«NN»: Ci zdoleje sama Rasija paciahnuć sieryjnuju vytvorčaść tankaŭ koštam kala $8 młn za adzinku?

— Takich tankaŭ raniej nie było, tamu usie kamplektujučyja ŭnikalnyja i darahija. Ale, kali «Armata» pojdzie ŭ sieryjnuju vytvorčaść, to košt upadzie dzieści da $4—5 miljonaŭ. A pakul budziem čakać i sačyć za tym, što z usiaho hetaha vyjdzie.

Techničnyja charaktarystyki t-14 «Armata». AiF

Techničnyja charaktarystyki t-14 «Armata». AiF

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?