Karykatura: seopticum.com
Kampanija Apple raspaviała pra svajho pošukavaha robata Applebot, što ŭžo vykarystoŭvajecca jak minimum u hałasavym asistencie Siri i pošukaviku OS X Spotlight. Staronka źjaviłasia jašče ŭ lutym, ale była dapoŭnienaja padrabiaznym apisańniem tolki 5 maja.
Pa zmoŭčvańni Applebot dziejničaje tak ža, jak i robat Google, kali administratar sajta nie prapisaŭ dla jaho asobnyja ŭmovy ŭ fajle robots.txt.
Infarmacyja pra Applebot pryznačanaja dla raspracoŭščykaŭ sajtaŭ i sama pa sabie nie śviedčyć ab stvareńni Apple ułasnaha internet-pošukavika.
Siri zvyčajna vykarystoŭvaje pošuk Microsoft Bing i Wolfram Alpha, razvažaje 9to5mac. Pryčyny raspracoŭki ŭłasnaha pošukavaha robata nieviadomyja. Na dumku redaktara vydańnia, robat raspracavany chutčej dla padtrymki inšych pošukavych sistem i ŭdaskanaleńnia vydačy Siri ci Spotlight.
Čutki pra raspracoŭku ułasnaha pošuku Apple źjavilisia ŭ pačatku 2015 hoda, kali kampanija spačatku vystaviła abjavu ab pošuku kiraŭnika kamandy navukoŭcaŭ, raspracoŭščykaŭ i analitykaŭ, što zajmajecca relevantnaściu pošuku, a zatym dadała jašče try «pošukavych» vakansii.
Pošuk Google ciesna źviazany z asnoŭnaj krynicaj prybytku Google — rekłamaj. U 2014 hodzie vyručka ad rekłamy skłała 59 młrd dalaraŭ. Źjaŭleńnie mocnaha kankurenta na pošukavym rynku moža pachisnuć pazicyi Google i na rynku rekłamy.
Adnojčy Apple ŭžo advažvałasia z nula stvarać kankurenta raźvitamu praduktu Google: u 2012 hodzie kampanija pradstaviła kartahrafičny servis Apple Maps.
U pieršyja miesiacy isnavańnia servis žorstka krytykavaŭsia za niedaskanałaść. Naprykład, jon pieratvaryŭ vilenski aeraport u «viasiołyja horki» — takija karcinki karystalniki nazirali pa ŭsim śviecie. Ź ciaham času pamyłki vypraŭlalisia, a krytyki stanaviłasia mienš.
