Staršynia Centralnaj vybarčaj kamisii Lidzija Jarmošyna ŭziała ŭdzieł u prahramie «Bujnym płanam» na telekanale «Biełaruś-1».
U adkaz na pytańnie ab nizkaj palityčnaj aktyŭnaści napiaredadni vybaraŭ jana paraiła kandydatam zavodzić błohi i prysutničać u sacsietkach.
«Kali ty źbiraješsia pajści na vybary, to stvary za piać hod da vybaraŭ błoh u internecie, zavodź sabie frendaŭ, viadzi šyrokuju pierapisku, abmiarkoŭvaj usie — ad teatralnaj pastanoŭki da ČS pa chakiei. Budź ŭsiudy, — rekamienduje Jarmošyna. — I ty tak pastupova stanieš viadomym, darečy, absalutna biaspłatna praktyčna. I na dziaržavu niama čaho narakać».
Jakija biełaruskija palityki jość u sacsietkach
Z palitykaŭ, jakija zajavili pra namier bałastavacca ŭ prezidenty ŭ 2015 hodzie, na Facebook možna znajści Anatola Labiedźku (jaho vyłučyła AHP), Taćcianu Karatkievič (kandydat ad «Narodnaha refierendumu»/»Havary praŭdu», padtrymanaja BNF) i Siarhieja Kalakina (jaho prapanuje vyłučyć «Spraviadlivy śviet»), a taksama pieršaha namieśnika staršyni TBM Alenu Anisim (samastojna zajaŭlała ab namiery ŭziać udzieł u vybarach).
Facebook Mikałaja Statkieviča (jakoha niekali prapanoŭvali vyłučyć u jakaści kandydata) viaduć jaho rodnyja. Sam Statkievič znachodzicca ŭ źniavoleńni z vybaraŭ 2010 hoda. Pa słovach jaho advakata, u turmie Statkievič zastaniecca jašče hod i 7 miesiacaŭ.
Padtrymany Zialonymi «Kandydat-darmajed» Juryj Šulhan u sacsietkach nie byŭ znojdzieny. Lidar ŁDP Siarhiej Hajdukievič (jaki taksama zajaviŭ ab mahčymym udziele ŭ vybarach) u sacsietkach taksama nie zaŭvažany.
Sam Alaksandr Łukašenka nie prysutničaje ŭ sacsietkach. Tym nie mieniej, pieršakrasavicki žart «Našaj Nivy» pra Instagram Łukašenki niekatoryja ŚMI ŭspryniali surjozna. Pres-słužba Łukašenki zajaviła pra adsutnaść Instagram Łukašenki ci inšych akaŭntaŭ u sacsietkach.
U roznych sacsietkach možna znajści bahata biełaruskich palitykaŭ, u tym liku byłych kandydataŭ u prezidenty: Aleś Michalevič, Andrej Sańnikaŭ, Vital Rymašeŭski, Ryhor Kastusioŭ, Uładzimir Niaklajeŭ, Jarasłaŭ Ramančuk i Alaksandr Milinkievič.
Frendzicie taksama: 50 asobaŭ u biełaruskim fejsbuku, na jakich varta padpisacca
