Supracoŭnikami kryminalnaha vyšuku Partyzanskaha RUUS Minska zatrymanaja 35-hadovaja žycharka stalicy, jakaja znachodziłasia na dziaviatym miesiacy ciažarnaści. Jana padazrajecca va ŭčynieńni kradziažu z sacyjalna-piedahahičnaha centra.
Jak paviedamlaje HUUS Minharvykankama, u sacyjalna-piedahahičny centr ciažarnaja žančyna źviarnułasia pa kansultacyju nakont mahčymaści źniaćcia raniejšaj sudzimaści za kradziež. Paśla abmierkavańnia pravavych pytańniaŭ, z ulikam jaje stanovišča, budučaj maci prapanavali pahladzieć humanitarnuju dapamohu dla taho, kab vybrać patrebnyja joj rečy.
Kab nie pieraškadžać, rabotnik centra vyjšła z kabinieta. Kali jana viarnułasia praz čverć hadziny, u kabiniecie ŭžo nikoha nie było. Praktyčna adrazu supracoŭnica centra vyjaviła źniknieńnie ź jaje sumački kašalka. U im było 210 dołaraŭ ZŠA, 800 tys. rubloŭ i bankaŭskija kartki.
Padčas praviadzieńnia vyšukovych mierapryjemstvaŭ supracoŭnikami kryminalnaha vyšuku padazronaja ŭ kradziažy była zatrymanaja. Jana pryznałasia, što zabrała hrošy, a kašalok vykinuła. Pry hetym častka hrošaj była ŭžo patračanaja, a kašalok znajšoŭsia ŭ kantejniery dla śmiećcia.
U dačynieńni da padazronaj raspačataja kryminalnaja sprava za kradziež. Joj pahražaje pazbaŭleńnie voli da 4 hadoŭ.
