Na fonie ahresiŭnych dziejańniaŭ Rasii ŭ Jeŭropie amierykanskaja bajavaja hrupa, jakaja znachodzicca ŭ Jeŭropie, prapanuje pastavić na BMP Stryker bolš mahutnuju zbroju — 30-mm aŭtamatyčnyja puški.
BMP Stryker 2-ha kavaleryjskaha pałka ŭ Rumynii; breakingdefense.com
2-hi kavaleryjski połk ZŠA, jaki całkam uzbrojeny Stryker'ami, ličyć, što isnuje «vysokapryjarytetnaja patreba» padvysić zabojčuju moc zbroi niepasrednaj padtrymki piachoty. Pra heta paviedamiŭ sajt breakingdefense.com sa spasyłkaj na dakumient Departamienta suchaputnaj armii ZŠA.
Ciapier Stryker maje ŭ jakaści asnoŭnaha uzbrajeńnia bujnakalibierny 12,7-mm kulamiot. Raniej na jaho šasi pastavili 105-mm pušku, atrymaŭšy kołavuju samachodku M1128 Mobile Gun System, adnak dadatkovyja miechanizmy i bojezapas zaniali ŭsio miesca, jakoje raniej zajmaŭ piachotny desant. Usiaho zaraz na ŭzbrajeńni SŠA znachodziacca 139 M1128 MGS.
Čakajecca, što 30-mm aŭtamatyčnaja puška, jakuju pierš za ŭsio musiać atrymać BMP, jakija znachodziacca ŭ Jeŭropie, značna padvysiać ahniavuju moc miechanizavanaj hrupy 2 kavaleryjskaha pałka. Pry hetym u 16-tonnych mašynach musić zastacca dastatkova miesca dla piechacincaŭ.
Potym takim ž čynam mohuć być pieraŭzbrojenyja i inšyja BMP Stryker.
2-kavaleryjski połk u 2014 i ŭ pačatku 2015 hoda ŭdzielničaŭ u šmatlikich vučeńniach i manieŭrach u krainach Uschodniaj Jeŭropy, kab padtrymać chaŭruśnikaŭ ZŠA — najpierš krainy Bałtyi i Polšču. Miesiac tamu prykładna 60 Stryker'aŭ praviali amal 2000-kiłamietrovy marš z Estonii, Łatvii i Litvy praz Polšču i Čechiju ŭ Niamieččynu.
Na biełaruskich BMP-2, jakija zastalisia nam ad savieckaj armii, stajać 30-mm aŭtamatyčnyja puški 2A42, adnak uzrovień abaronienaści savieckich BMP kudy nižejšaja, čym u Stryker. Brania BMP-2 abaraniaje ŭ asnoŭnym tolki ad kulaŭ 7,62-mm, u toj čas jak intehravanaja kieramičnaja brania Stryker vytrymlivaje streły 14,5-mm bujnakalibiernych kulamiotaŭ i vintovak. Da taho ž Stryker śpiecyjalna sprajektavany dla maksimalnaj abarony ekipaža ad minaŭ i impravizavanych vybuchovych pryład.
Rasiejskija BMP-3 mohuć nablizicca da padobnaj stupieni abaronienaści (vytrymlivajuć kuli 12,7-mm z dystancyi 200 m) pry vykarystańni źniešniaj dadatkovaj brani, adnak u takim vypadku vaha BTR-3 vyrastaje z 18,7 ton da 22,4, što pryvodzić da bolš chutkaha znosu chadavoj častki i panižaje ahulnuju mabilnaść mašyny.
