Sioleta centralizavanaje elektronnaje zaličeńnie abituryjentaŭ u VNU prymianiacca nie budzie, zajaviŭ na pres-kanfierencyi 27 krasavika pieršy namieśnik ministra adukacyi Vadzim Bohuš.
Pavodle jaho słoŭ, ukaranieńnie takoha padychodu patrabuje ŭniasieńnia źmianieńniaŭ u arhanizacyju ŭstupnaj kampanii. «Sioleta my nie płanujem arhanizacyjnyja źmianieńni, adpaviedna nie płanujecca vykarystańnie sistemy ŭ centralizavanym režymie. Razam z tym u nas jość płan pa tym, jak my z hetaj sistemaj nadalej budziem pracavać», — skazaŭ jon.
Ciapier elektronnaje zaličeńnie prymianiajecca ŭ miežach asobnych VNU. «Tut asnoŭnaja inicyjatyva za ŭstanovami adukacyi, tamu što sistema dastatkova zručnaja, i ja spadziajusia, što ŭ nastupnym hodzie kolkaść VNU, jakija jaje vykarystoŭvajuć, budzie pavialičvacca», — adznačyŭ Bohuš.
Pry hetym jon padkreśliŭ, što praces aŭtamatyzacyi pracy pryjomnaj kamisii prachodzić u kožnaj VNU z ulikam śpiecyfiki ŭstanovy adukacyi. «Jak praviła, jany jaje vybudoŭvajuć z ulikam asablivaściej pryjomu. VNU, u jakich jość tvorčyja śpiecyjalnaści, spartyŭnyja vyprabavańni, — u ich adna śpiecyfika pracy. Tyja VNU, jakija aryjentujecca tolki na vyniki centralizavanaha testavańnia, — u ich inšaja śpiecyfika pracy», — patłumačyŭ jon.
Nahadajem, u krasaviku 2014 hoda tahačasny ministr adukacyi Siarhiej Maskievič zajaŭlaŭ, što ŭ 2015 hodzie ŭ Biełarusi płanujecca aprabavać sistemu centralizavanaha elektronnaha zaličeńnia ŭ VNU, jakaja daje abituryjentam mahčymaść vybrać niekalki śpiecyjalnaściej i ŭniviersitetaŭ u paradku ich pryjarytetnaści. Zaličeńnie ŭ hetym vypadku pavinna prachodzić aŭtamatyčna na padstavie vynikaŭ ekzamienaŭ abituryjentaŭ i prachadnych bałaŭ u vybranych imi VNU.
