AR
Ź Niepała, dzie ciaham troch dzion adbyvajucca padziemnyja šturški, sprabujuć vyjechać turysty-biełarusy. Aeraporty pierapoŭnienyja, i vyjechać z krainy ciapier vialikaja prablema.
«Siońnia niekatoryja ambasady evakuiravali žycharoŭ Jeŭrasajuza. My adpraŭlali chłopčyka z Hiermanii ŭ Tajłand na lačeńnie, byli ŭ aeraporcie. Nas bielhijcy nie zachacieli brać na bort samalota, jaki evakuiruje ludziej. Supracoŭnica, jakaja zajmałasia pasadkaj na samalot, a kvitki pry hetym biaspłatnyja, skazała, što biełarusy nie jeŭrapiejcy. Ja kažu: «My — Jeŭropa». A jana adkazvaje: «Vy nie Jeŭrasajuz». Tady ja i maja znajomaja z Rasii spytali, što ž nam rabić? Na što hetaja spadarynia adkazała: «Ustupajcie ŭ Jeŭrasajuz», — raspaviadaje hramadzianka Biełarusi Luboŭ Pranievič, jakaja apynułasia ŭ Katmandu akurat padčas ziemlatrusu.
Pa jaje słovach siońnia z ranicy ŭ krainie było spakojna, a da hetaha ciaham dvuch dzion naziralisia padziemnyja šturški. Samy mocny, jaki i prynios vialikija razbureńni, adbyŭsia ŭ subotu. Ciapier jość pahroza atručvańnia vady ad trupaŭ, bo mnoha ludziej zahinuła, i nie ŭsich paśpieli znajści dy pachavać.
Unačy ludzi śpiać u namiotach na vulicy, bo zastavacca ŭ pamiaškańniach ryzykoŭna z-za paŭtornych ziemlatrusaŭ.
Luboŭ havoryć, što žyćcio ŭ krainie pakrysie naładžvajecca — źjaŭlajecca elektryčnaść, niedzie jość internet. «U hazietach — samyja strašnyja karcinki, ale na miescy ŭsio vyhladaje nie tak žachliva, na moj pohlad», — havoryć Luboŭ.
Kali adbyŭsia ziemlatrus i pra heta stali pisać ŚMI, a Luboŭ Pranievič nie vychodziła na suviaź, jaje siabroŭka zvaniła ŭ MZS Biełarusi, kab daviedacca, ci moža źniešniepalityčnaje viedamstva dapamahčy z pošukam hramadzianki našaj dziaržavy. Na što dziažurny supracoŭnik MZS skazaŭ, što viedamstva cikaviłasia losam arhanizavanych turhrup ź Biełarusi, a ŭ vypadku z samastojnymi turystami i, ŭ pryvatnaści, z asobaj Pranievič, paraili zvanić, jak budzie bolš kankretnaja infarmacyja pra jaje. Pry hetym MZS aficyjna paviedamlaŭ, što biełarusy pa dapamohu ŭ suviazi ź ziemlatrusam u Niepale nie źviartalisia.
Jak paviedamili ŭłady Niepała, aficyjnaja kolkaść achviar ziemlatrusu, jaki adbyŭsia 25 krasavika, na dadzieny momant składaje 3 617 čałaviek, paciarpiełych — 6 538. Dadzienyja buduć abnaŭlacca.
Pad łavinami na Eviereście zahinuli pa mienšaj miery 17 čałaviek, bolš za 60 atrymali traŭmy. 90 čałaviek zahinuli ŭ susiednich ź Niepałam krainach — Indyi i Kitai.
Sotni tysiač ludziej u Niepale i paciarpiełych rajonach Indyi pravodziać druhuju noč zapar na vulicy, bajučysia novych padziemnych šturškoŭ. U ich mała ježy i vady.
Ziemlatrus mahnitudaj 7,9, z epicentram pamiž stalicaj Katmandu i horadam Pokchara staŭ samym mahutnym za apošnija 80 hadoŭ.
