U vypadku likvidacyi zališniaj kolkaści rabotnikaŭ na dziaržaŭnych pradpryjemstvach uzrovień biespracoŭja ŭ Biełarusi moža pavialičycca na 4,2 pracentnaha punkta, havorycca ŭ zapiscy Suśvietnaha banka pa pytańniach transfarmacyi rynku pracy, prezientacyja jakoj adbyłasia 27 krasavika ŭ Minsku.
Nahadajem, u pačatku 2015 hoda aficyjny ŭzrovień biespracoŭja ŭ Biełarusi składaŭ 0,8%.
Na dumku ekanamistaŭ Suśvietnaha banka, heta pakazčyk moža istotna vyraści ŭ vypadku ŭstaranieńnia zališniaj zaniataści na dziaržaŭnych pradpryjemstvach. «Prykładna dźvie traciny rabotnikaŭ zaniatyja ŭ siektary dziaržpradpryjemstvaŭ. Vysnovy ekanamietryčnaha analizu na asnovie danych na ŭzroźni pradpryjemstvaŭ śviedčać ab tym, što zališniaja kolkaść rabotnikaŭ na dziaržpradpryjemstvach składaje u siarednim kala 10%», — kanstatujuć ekśpierty banka.
Na ich dumku, paharšeńnie ŭ Biełarusi makraekanamičnaj situacyi «pavialičvaje vydatki zachavańnia niepradukcyjnych pracoŭnych miescaŭ».
«Kali ŭ poŭnaj miery likvidavać zališniuju kolkaść rabotnikaŭ, uzrovień biespracoŭja moža vyraści sama mieniej na 4,2 pracentnaha punkta», — havorycca ŭ zapiscy Suśvietnaha banka.
U pačatku 2015 hoda, kanstatujuć ekśpierty banka, šerah dziaržpradpryjemstvaŭ vykarystoŭvali administracyjnyja adpačynki i zatrymlivali vypłaty zarpłaty. «Hetyja miery nie sadziejničajuć pavieličeńniu pradukcyjnaści pracy, čaho možna dabicca ŭ chodzie strukturnych reform», — padkreślivajuć ekanamisty Suśvietnaha banka.
Ekśpierty banka rekamiendujuć biełaruskim uładam pierahledzieć miechanizm akazańnia padtrymki toj častki nasielnictva, jakaja zastajecca biez pracy.
«Pakiet isnujučych mier padtrymki na rynku pracy nie adpaviadaje patrebam dynamičnaha rynku pracoŭnych miescaŭ. Uzrovień dapamohi pa biespracoŭi vielmi mały i achoplivaje niaznačnuju kolkaść biespracoŭnych», — kanstatujuć ekśpierty banka.
Na ich dumku, isnujučaja słabaja padtrymka dachodaŭ biespracoŭnych abciažarvaje praviadzieńnie restrukturyzacyi dziaržpradpryjemstvaŭ. «Hałoŭnym vyklikam zastajecca akazańnie dziejsnaj padtrymki dachodaŭ usich biespracoŭnych takim čynam, kab minimizavać pabočnyja efiekty ŭ vyhladzie skaračeńnia stymułaŭ da pracy, a taksama ŭličyć isnujučyja fiskalnyja abmiežavańni», — ličyć ekśpierty Suśvietnaha banka.
