fota Siarhieja Zinina
Rasijskija bajkiery, što biaruć udzieł u motaprabiehu da 70-hodździa Pieramohi, rychtujucca da pierajezdu biełaruska-polskaj miažy na pamiežnym pierachodzie «Varšaŭski most» u Breście. Da miažy ich supravadžała mašyna DAI.
Udzieł biaruć 10 matacykłaŭ. Pa Biełarusi jany jechali pad rasijskimi i biełaruskimi ściahami. Jany raskazali karespandentu «Našaj Nivy», što nivodzin biełaruski bajkier ź imi nie jedzie.
Praŭda, bajkiery nie vyklučajuć, što ich nie puściać praz polskuju miažu. Učora na elektronnuju poštu im prajšli ŭviedamleńni, što ich vizy anulavanyja.
fota Siarhieja Zinina
Bajkiery žartujuć, što, kali ich nie puściać na terytoryi Polščy na pamiežnym pierachodzie, jany «buduć katapultavacca praź les».
Siarod bajkieraŭ chodziać čutki, što pa toj bok miažy ich čakajuć polskija kalehi-bajkiery, jakija abiacalisia ich supravadžać.
Rasijskija bajkiery ŭ svaju čarhu dzielacca na dźvie častki: tyja, kamu anulavanyja niamieckija vizy, i astatnija.
Kiraŭnik hrupy rasijskich bajkieraŭ razdaje lehiendu: tyja, u kaho niehiermanskija vizy, jeduć na chakiejny matč, a tyja, u kaho niamieckija vizy, — jeduć va Urocłaŭ.
fota Siarhieja Zinina
13:03
Bajkiery znachodziacca ŭ tranzitnaj zonie, palaki pakul nie puskajuć ich u krainu.
Razam z tym hramadzianin Polščy, jaki jeździe ŭ Biełaruś, kaža, što z taho boku miažy rasijskich bajkieraŭ čakaje vialikaja kolkaść ich kalehaŭ na matacykłaŭ.
Taksama rasijskija bajkiery paviedamlajuć, što zaŭtra, 28 krasavika, u Biełaruś pryjazdžaje kiraŭnik «Načnych vaŭkoŭ» Alaksandr «Chirurh» Załdastanaŭ. Miarkujecca šerah mierapryjemstvaŭ, u tym liku pa ŭšanavańni vieteranaŭ.
* * *
Učora bajkiery naviedali Kurhan Słavy i Chatyń pad Minskam. Pryčym na Kurhanie Słavy ich sustrakali na vysokim uzroŭni z udziełam pradstaŭnikoŭ Administracyi prezidenta. Rasijskich i impierskich ściahoŭ na sustrečy nie było, haspadary byli pad dziaržaŭnymi čyrvona-zialonymi ściahami.
Raniej Polšča zajaviła, što suprać prajezdu bajkieraŭ, mnohija ź jakich majuć dačynieńnie da ruchu «Antymajdan», pa svajoj terytoryi i anuluje ich vizy. Abureńnie hramadskaści vyklikaŭ toj fakt, što «Načnyja vaŭki» brali ŭdzieł u anieksii Kryma i sprobie zachopu Danbasa.
Tak, premjer-ministr Eva Kopač rascaniła prajezd «Načnych vaŭkoŭ» pa terytoryi krainy jak pravakacyju. U toj ža čas lidar polskaha motakłuba «Katynski motaprabieh» Viktar Vienhžyn hatovy abaraniać rasijskich bajkieraŭ padčas prajezdu cieraz Polšču, kali im pasprabujuć pieraškodzić.
24 krasavika MZS Polščy pieradało ŭ pasolstva Rasii ŭ Varšavie notu, u jakoj admoviła hrupie rasijskich matacyklistaŭ va ŭjeździe na polskuju terytoryju.
