Fota Dźmitryja Bruško, TUT.BY

Fota Dźmitryja Bruško, TUT.BY

Pamočnik prezidenta pa ekanamičnych pytańniach Kirył Rudy ŭ apošni čas aktyŭna raźvivaje temu strukturnych ekanamičnych reformaŭ.

U artykule dla «Biełaruskaha ekanamičnaha časopisa» Rudy, u pryvatnaści, razvažaje pra novuju ekanamičnuju ideju.

Na praktycy novaja ekanamičnaja ideja zaklučajecca ŭ praviadzieńni šerahu kankretnych reformaŭ. Pryčym, «biez palityčnaj voli nie budzie ni padtrymki, ni davieru da reformaŭ», pierakanany Kirył Rudy.

Vyhady ad strukturnych ekanamičnych reformaŭ u karotkaterminovym (troch-piacihadovym) pieryjadzie: prytok pramych zamiežnych inviestycyj, stvareńnie novych vysokapradukcyjnych pracoŭnych miescaŭ.

U doŭhaterminovym (dvaccacihadovym) pieryjadzie vyhady zaklučajucca va ŭstojlivym ŭmieranym ekanamičnym roście, źnižeńni inflacyi, zbližeńni ŭzroŭniu žyćcia z raźvitymi krainami, raźvićci ŭłasnaj inavacyjnaj sistemy.

Vydatki ŭ karotkaterminovym pieryjadzie: padzieńnie realnaha VUP, vytvorčaści, spažyvańnia, rost biespracoŭja, adtok pracoŭnaj siły za miažu, inflacyja, padzieńnie ŭzroŭniu žyćcia.

U doŭhaterminovym pieryjadzie vydatkami źjaŭlajucca: zachavańnie vysokaha ŭzroŭniu biespracoŭja, niekatoryja vahańni ŭzroŭniu vytvorčaści i spažyvańnia.

«Vidavočna, što strukturnyja ekanamičnyja reformy niepapularnyja: karotkaterminovyja vydatki buduć pieravažać va ŭsprymańni hramadstva nad karotka- i doŭhaterminovymi vyhadami.

U hetaj suviazi ŭźnikaje žadańnie raściahnuć reformy, jakoje moža pieraraści ŭ spakusu zatarmazić ich ci nie ździajśniać ich naohuł. Pry hetym biez praviadzieńnia reformaŭ palapšeńnie ekanamičnaj situacyi małavierahodna», — piša Kirył Rudy.

«Važna razumieć košt strukturnych ekanamičnych reformaŭ: źnižeńnie ŭzroŭniu žyćcia ciapierašniaha pakaleńnia dziela ŭstojlivaha rostu dabrabytu nastupnaha pakaleńnia», — zaklučaje jon.

Na dniach Kirył Rudy vystupiŭ z dakładam «Miechanizmy realizacyi ekanamičnaj stratehii Biełarusi» na kanfierencyi ŭ Minsku, arhanizavanaj Instytutam ekanomiki Nacyjanalnaj akademii navuk.

Rudy vyłučyŭ try patencyjnyja miechanizmy realizacyi stratehii.

Pieršy — inercyjnaja madel, kali ekanomika funkcyjanuje, jak i raniej. «Pry hetym tradycyjnyja ŭnutranyja finansavyja krynicy paskoranaha raźvićcia biełaruskaj ekanomiki — biudžet i dziaržaŭnyja banki — adčuvajuć strukturnyja ciažkaści ź finansavańniem i likvidnaściu, što vyjaŭlajecca ŭ chraničnaj inflacyi i darahich hrošach. Źniešnija krynicy — pramyja zamiežnyja inviestycyi — abmiežavanyja starymi daŭhami i inviestycyjnymi ryzykami. Usio heta moža pryvieści da doŭhaterminovaha zapavoleńnia ekanomiki», — skazaŭ pamočnik Łukašenki.

Jašče adzin miechanizm — ručnoje praviadzieńnie strukturnych reformaŭ. «U hetym vypadku staŭka robicca na tyja asobnyja vidy pramysłovaści, dzie vidavočnaja addača.

Samaja hałoŭnaja ryzyka ŭ tym, što ručnoje praviadzieńnie reformaŭ subjektyŭnaje.

Možna zrabić pamyłku pry vybary pryjarytetnych halin. Siońnia rastuć bijatechnałohii, a zaŭtra drajvieram moža stać toje, što nam siońnia naohuł nieviadoma», — adznačyŭ Rudy.

Mahčyma, pamočniku prezidenta bolš simpatyčny miechanizm praviadzieńnia strukturnych reformaŭ šlacham palapšeńnia pracy instytutaŭ i raźvićcia kankurencyi. Taki padychod moža zabiaśpiečyć siaredniehadavy ŭzrovień pryrostu VUP na 5%.

Tut mahčymyja dva varyjanty.

Za asnovu možna ŭziać kitajskuju madel, jakaja zasnavanaja na dośviedzie Sinhapura i Karei.

Hetaja madel praduhledžvaje pastupalnaść reformaŭ ad bolš lohkich da bolš składanych, šlacham praviadzieńnia ekśpierymientaŭ, pieraŭtvareńniaŭ u industryjalnaj śfiery, dyfierencyjacyi dachodaŭ, kankurencyi pracoŭnaj siły, tranśfiertu technałohij. U vyniku kitajskaja ekanomika dasiahała 8—10% adsotkaŭ pryrostu ŭ hod, valutnyja reziervy stali najbujniejšymi ŭ śviecie. Ale ŭ apošnija hady tempy rostu źnizilisia da 7%. «Kitajskuju madel časta paraŭnoŭvajuć z rovaram: ŭstojlivy, pakul jedzie. Pakul iduć reformy zabiaśpiečvajecca ŭstojlivy rost», — skazaŭ Rudy.

Bolš cikavym Rudamu bačycca vopyt ŭschodniejeŭrapiejskich krain (Polšča, Čechija, Bałharyja).

Pryvatyzacyja, bankructva nieefiektyŭnych dziaržpradpryjemstvaŭ, libieralizacyja cen, skaračeńnie dziaržaŭnych vydatkaŭ i aktyvizacyja małoha biznesu akazali stanoŭčy ŭpłyŭ na ŭzrovień čałaviečaha raźvićcia hetych krain. «Čym bolš aktyŭna pravodzilisia reformy, tym chutčej raźvivalisia hetyja krainy», — skazaŭ Rudy.

U zaklučeńnie svajho dakładu pamočnik prezidenta skazaŭ, što ŭ kułuarach časta čuje skieptycyzm pa hetych pytańniach.

Maŭlaŭ, usie hetyja stratehii pakidajuć adčuvańnie nierealnaści. Tamu jon dazvoliŭ sabie pryvieści cytatu ź japonskaj haziety Japan Herald za 1881: «My nie dumajem, što Japonija kali-niebudź razbahacieje: (hetamu pieraškadžajuć pieravahi, padaravanyja pryrodaj, a taksama prychilnaść japonskaha naroda da biaździejnaści i zadavalnieńniaŭ). Japoncy — ščaślivy narod, i, pakolki jany zadavolenyja tym niamnohim, što majuć, jany naŭrad ci šmat čaho dasiahnuć».

Aŭdytoryja acaniła tonki pasył vysokapastaŭlenaha čynoŭnika. Ad razmovy z žurnalistami Kirył Rudy admoviŭsia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?