Ułady Biełarusi praciahvajuć pracu pa pryvatyzacyi, «nijakaj repryvatyzacyi nie płanujecca», zajaviŭ u intervju estonskaj haziecie «Diełovyje viedomosti» namieśnik ministra zamiežnych spraŭ Biełarusi Alaksandr Hurjanaŭ, adkazvajučy na pytańnie ab mahčymym uvachodžańni dziaržavy ŭ skład ZAT «Miłavica», 81% akcyj jakoj naležać estonskaj kampanii Silvano Investment Group. Intervju apublikavanaje na sajcie biełaruskaha MZS.

«Dziaržava nie maje namieru raschodavać biudžetnyja srodki dla taho, kab trymać na płyvu nieefiektyŭnyja pradpryjemstvy. Kali ŭ bujnoha pradpryjemstva ŭźnikajuć prablemy, to źmianšajucca padatkovyja pastupleńni. I, pavodle zakanadaŭstva Biełarusi, dziaržava moža prapanavać pavieličeńnie doli svajho ŭdziełu dla taho, kab padsiłkavać statutny kapitał, — adznačyŭ Hurjanaŭ. —

I razmova nie idzie pra toje, kab zrabić kampaniju dziaržaŭnaj abo ŭmiešvacca ŭ kamiercyjnyja spravy. Pa-pieršaje, u dziaržavy niama takich resursaŭ, kab vykuplać užo pryvatyzavanuju majomaść.

Pa-druhoje, dziaržava jak minarytarny ŭdzielnik kankretnaha akcyjaniernaha tavarystva zacikaŭlenaja ŭ jaho kamiercyjnaj stabilnaści». 

Biełaruski čynoŭnik pryvioŭ «Miłavicu» jak prykład paśpiachovych estonskich inviestycyj. «Nam udałosia sumiaścić vytvorčy vopyt i technałohii ŭ Biełarusi ź inviestycyjnymi mahčymaściami Estonii», — padkreśliŭ namieśnik ministra. 

Na zaŭvahu žurnalistki ab tym, što niekatoryja pradstaŭniki biźniesu adznačajuć šerah faktaraŭ, jakija strymlivajuć pryciahnieńnie ŭ Biełaruś zamiežnych inviestycyj (vysokaja rehulacyja ekanomiki, biurakratyčnyja ciažkaści, valutnyja ryzyki), Hurjanaŭ zajaviŭ: «Z punkta hledžańnia prablem ź miascovaj administracyjaj i biurakratyjaj my ničym nie adroźnivajemsia ad siaredniestatystyčnaj jeŭrapiejskaj dziaržavy.

My viedajem, što takoje jeŭrapiejskaja biurakratyja. I raździmać z hetaha ahulnuju prablemu pa vychadu na rynak Biełarusi, pa-mojmu, niapravilna.

Jość ciažkaści z-za ŭzrušeńniaŭ u RF, jakija cisnuć na naš valutny rynak. Tamu niejkija abmiežavańni my vymušanyja prymać dla taho, kab zabiaśpiečyć stabilnaść unutranaha rynku, u tym liku i ŭ intaresach samich inviestaraŭ». 

Pradstaŭnik ŚMI nahadała, što pamiž dźviuma krainami dziejničajuć dahavory ab handlova-ekanamičnym supracoŭnictvie i ab paźbiahańni dvajnoha padatkaabkładańnia, adnak pahadnieńnie ab abaronie inviestycyj, padpisanaje ŭ 2009 hodzie, pakul tak i nie nabyło moc. «Z Estonijaj atrymałasia tak, što adrazu paśla padpisańnia pahadnieńnia ab abaronie inviestycyj ad nas zapatrabavali skarektavać tekst z ulikam patrabavańniaŭ Jeŭrapiejskaj kamisii. Na ŭzroŭni dvuch MZS my hetuju temu ŭzdymali, i, chutčej za ŭsio, da kanca hetaha miesiaca adbuducca dvuchbakovyja pieramovy ekśpiertaŭ pravavych departamientaŭ adnosna taho, jak nam maksimalna chutka skarektavać tekst i zabiaśpiečyć ratyfikacyju z estonskaha boku», — paviedamiŭ Hurjanaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?