Siniehnojnaja pałačka-«zombi». Fota: CDC/ Janice Haney Carr/ Wikimedia Commons
Izrailskija navukoŭcy zaŭvažyli, što zabityja nitratam srebra kletki siniehnojnaj pałački prajaŭlajuć antybakteryjalnyja ŭłaścivaści suprać svaich žyvych bratoŭ, raspaviadaje N+1. Daśledavańnie apublikavanaje ŭ časopisie Scientific Reports.
«Efiekt zombi», jak jaho nazvali navukoŭcy, prajaviŭsia ŭ tym, što asadak ad miortvych kletak zabivaŭ žyvyja kletki tak ža efiektyŭna, a pry nizkich kancentracyjach pačatkovaj dozy navat bolš efiektyŭna za ŭłasna asiarodździe z čaścinkami srebra.
Hety efiekt źviazvajuć z pryncypam Le-Šatelje, pavodle jakoha pry ŭźniknieńni ŭ raŭnavažnaj sistemie sił, što mianiajuć hetuju raŭnavahu, utvarajucca i supraciŭnyja pracesy.
Asadak z atručanych srebram kletak vykidaje zališak srebra ŭ asiarodździe, kab adnavić ź im raŭnavahu, i takim čynam zabivaje žyvyja kletki.
«Zombi-apakalipsis» byŭ zaŭvažany padčas pošuku tłumačeńnia vysokaj praciahłaści antybakteryjalnaha efiektu srebra. Efiekt srebra daŭno viadomy ŭ navucy: ciažki mietał ŭtvaraje tryvałyja kompleksy ź białkami kletak i parušaje ich funkcyjanavańnie. Srebra vykarystoŭvajecca dla abiezzaražvańnia ran i ŭ admysłovych antybakteryjalnych bintach.
