Ciaham hetaj zimy ceły šerah biełaruskich futbalistaŭ zaklučyŭ kantrakty z mocnymi eŭrapiejskimi i rasiejskimi klubami. Novyja kamandy znajšli Anton Puciła, Vasil Chamutoŭski, Maksim Ramaščanka, Jahor Filipienka, Arciom Radźkoŭ, Viačasłaŭ Hleb i inšyja.

Najbolš jarki prykład paŭabaroncy mienskaha “Dynama” Antona Puciły. 20-hodovy hulec moładzievaj zbornaj Biełarusi padpisaŭ kantrakt z trecim klubam niamieckaj Bundeślihi — “Hamburham”. Puciła budzie trecim biełarusam, jaki zhulaje ŭ niamieckim pieršynstvie, pierad im byli braty Alaksandar i Viačasłaŭ Hleby. Apošni, darečy, taksama hulaŭ za “Hamburh”. Nia fakt, što Anton adrazu zahulaje za niamiecki klub, tamu ž Alaksandru Hlebu napačatku zachodniaj karjery daviałosia niekalki sezonaŭ pabiehać za dubl “Štutharta”. Razam z tym, hałoŭny trener “Hamburhu” Tomas Dal zapeŭnivaje, što daść maładomu biełarusu šaniec zamacavacca ŭ asnovie.

U niamieckim nakirunku adbyŭ i bramnik zbornaj krainy Vasil Chamutoŭski. Jon pierabraŭsia z rasiejskaj “Tomi” va ŭschodniehiermanski «Karł Cajs», jaki hulaje ŭ druhim dyvizijonie. Kamanda pakul nie chapaje zorak ź nieba, ale prabicca ŭ dobry eŭrapiejski klub z druhoj Bundeślihi kudy lahčej, čym, skažam, ź pieršynstva Ŭkrainy. Plus da ŭsiaho Chamutoŭski budzie mieć u «Karł Cajsie» stabilnuju hulniavuju praktyku, jakoj jon nia mieŭ u Rasiei. Kažuć, što ŭ hetym pierachodzie važnuju rolu adyhraŭ trener zbornaj Biełarusi Bernd Štanhie, jaki niekali ŭznačalvaŭ kamandu ź Jeny.

Hrecki vektar raźvićcia karjery abraŭ abaronca nacyjanalnaj zbornaj Pavał Płaskonny. Jon źviazaŭ siabie z klubam “Panionijos”. Kamandu z pryharadu Atenaŭ treniruje niemiec Evald Linen, tamu, kažuć, što i tut nie abyšłosia biaz Štanhie.

U susiedniaj z Hrecyja Tureččynie budzie vystupać Maksim Ramaščanka. Niekalki sezonaŭ tamu jon užo hulaŭ za miascovy “Trabzaspor”, paśla čaho źjechaŭ u Rasieju, ale pakinuŭ pa sabie dobruju pamiać. Ciapier Maks budzie apranać majku “Bursasporu”.

Narešcie, sapraŭdnaje adradžeńnie nazirajecca siarod biełaruski lehijaneraŭ u Rasiei. Na miesca veteranaŭ biełaruskaha futbołu prychodziać zusim jašče maładyja hulcy.

Pieršym kantrakt z maskoŭskim “Spartakom” padpisaŭ abaronca BATE Jahor Filipienka. U kiraŭnictvie srebranaha pryziora čempijanatu Rasiei spadziajucca, što z dapamohaj biełarusa jany zmohuć zamacavać dziry ŭ centry abarony. Filipienka maje realny šaniec stać asnoŭnym hulcom zadniaj linii słavutaha rasiejskaha klubu.

Kaleha Filipienki pa BATE i zbornaj Biełarusi Arciom Radźkoŭ ciapier paŭnapraŭny hulec padmaskoŭnych “Chimak”. Niahledziačy na svoj małady ŭzrost, Radźkoŭ taksama razhladajecca jak hulec asnovy “Chimak” u budučym sezonie.

Najbolš haračaj temaj mižsezońnia ŭ biełaruskim futbole źjaŭlajecca pierachod u ramienski “Saturn” forvarda moładzievaj zbornaj Biełarusi Leanida Koviela. Mienskaje “Dynama” i lvoŭskija “Karpaty” nijak nia mohuć vyrašyć, kamu ŭrešcie naležali pravy na futbalista. Sprava Koviela nia vyrašanaje pa siońniašni dzień. Hałoŭnaje, kab hetaja niepryjemnaja historyja nie adbiłasia na hulni talenavitaha napadnika.

18-hadovy bramnik žodzinskaha “Tarpeda” Arciom Hamialko pierajšoŭ u maskoŭski “Lakamatyŭ”. Spačatku planavałasia, što juny biełarus budzie treniravacca z dublem, ale ŭžo ciapier jon jeździć na zamiežnyja zbory svajoj novaj kamandy z asnoŭnym składam.

Adnahodak Arcioma Siarhiej Palicievič zaklučyŭ pahadnieńnie z samarskimi “Kryłami Savietaŭ”. Na “biełaruskaha vunderkinda”, jak nazvaŭ Palicieviča “Sport-ekspres”, pretendavaŭ jašče šerah rasiejskich klubaŭ, ale prapanovy samarcaŭ akazalisia najbolš pryvabnymi. Siarod hałoŭnych pryčyn, čamu junak abraŭ “Kryły Savietaŭ”, jon nazvaŭ toje, što ŭžo ciapier u kamandzie troje biełarusaŭ — Dzianis Koŭba, Alaksiej Skviarniuk i Cimoch Kałačoŭ. Apošni nia tak daŭno pierajšoŭ u kamandu z “Rastova”.

“Na mazi” kantrakty ź piermskim “Amkaram” u Michaiła Afanaśjeva i Viačasłava Hleba, kali nie adbudziecca ničoha niezvyčajnaha, to pahadnieńni buduć zaklučanyja ŭžo bližejšym časam.

Na forvarda mienskaha “Dynama” Ŭładzimiera Jurčanku, jaki niadaŭna staŭ lepšym bambardziram “Kubku Sadružnaści”, pretendujuć picierski “Zenit” i ramienski “Saturn”.

U planie pierachodaŭ biełaruskich futbalistaŭ na lehijanerskija chlaby sioletniaje mižsezońnie abnadziejvaje. Čym bolej našych chłopcaŭ budzie hulać u mocnych kamand, tym lepš budzie nacyjanalnaj zbornaj. Apošniaja, darečy, užo ŭ nastupnuju sieradu praviadzie tavaryski matč sa zbornaj Malty na vyjeździe.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?