Pieršaje ŭ śviecie pieranosnaje bambaschovišča žaŭniery mohuć pryvieźci z saboj na hruzaviku i ŭstalavać z dapamohaj ekskavatara mienš čym za dźvie hadziny, paviedamiŭ sajt news.err.ee.
Fota z sajta kampanii-vytvorcy.
Pamiaškańnie, ścieny jakoha zroblenyja sa ščylnaha polietylenu, maje modulnuju schiemu pabudovy, i takim čynam moža być kolki zaŭhodna vialikim. Kožny modul Sub Safe U1, jaki treba schavać pad ziamlu, źmiaščaje 12 čałaviek. Pry patrebie moduli mohuć być abładavanyja roznymi sanitarna-hihijeničnymi sistemami, elektryčnaściu, vientylacyjaj i internet-suviaźziu.
Płastykavyja ścieny zabiaśpiečvajuć abaronu ad vilhaci, škodnych rečyvaŭ i vysokich i nizkich tempieratur - ad minus 50 da plus 80 hradusaŭ. Na ich možna macavać łožki i drabiny.
Zvyčajna bambaschoviščy i inšyja padziemnyja ŭmacavańni robiać ź bietonu ci mietału, što nie zabiaśpiečvaje poŭnaj abarony ad vady i vilhaci. U toj ža čas płastyk radykalna źnižaje vahu kanstrukcyi, robić jaje mabilnaj i chutkaj u zborcy.
Kampanija-vytvorca Terramil vypraboŭvała bambaschovišča Sub Safe U1 razam z vučonymi Univiersiteta Tartu. Pavodle jaje infarmacyi, moduli, kali ich zakapać u ziamlu na hłybiniu kala 2 metraŭ, vytrymlivajuć vybuch 155-mm artyleryjskaha snarada. Na hetym tydni padčas estonska-amierykanskich sumiesnych vučeńniaŭ bambaschovišča taksama vypraboŭvali na ŭdary avijabombaŭ, adnak pra vyniki pakul nie paviedamlałasia.
Jak vypraboŭvali Sub Safe U1 artyleryjskim abstrełam.
Krysta Kirs, adzin z dyrektaraŭ Terramil, ličyć, što Sub Safe U1 abaronić svaich žycharoŭ navat ad jadziernaj zbroi, kali budzie zakapanaja pad ziamlu na 40-50 mietraŭ. Pa jahonych słovach, takija krainy jak Saudaŭskaja Aravija, Bachrejn, Pakistan, Indyja i Jehipiet užo vykazali cikavaść da zakupki raspracoŭki.
