U čaćvier uviečary na aficyjnaj staroncy hazety «Biełorusy i rynok» u Facebook byŭ apublikavany tekst zvarotu kalektyvu redakcyi da akcyjaneraŭ zakrytaha akcyjanernaha tavarystva «Medyjarynak» — zasnavalnika vydańnia.
U hetym zvarocie žurnalisty vykazali niedavier hałoŭnamu redaktaru Valancinie Vieštart. Pavodle zajavy supracoŭnikaŭ hazety, Vieštart za dva miesiacy svajoj pracy «nastroiła suprać siabie ŭvieś tvorčy kalektyŭ», «prademanstravała niedastatkovy ŭzrovień kvalifikacyi» i «nizki ŭzrovień kiraŭničaj kultury», u cełym stvaryła ŭ vydańni «nievynosnyja ŭmovy» pracy z punktu hledžańnia maralna-psychalahičnaha klimatu.
«Niahledziačy na pieraškody narmalnaj pracy redakcyi, jakija stvarajucca hałoŭnym redaktaram, my nie dapuskali zbojaŭ vychadu hazety. I ŭ dalejšym ličym dla siabie biezadkaznym stavić pytańnie pra strajk abo masavuju admovu ad pracy. Miž tym sytuacyja, jakaja skłałasia na siońniašni dzień, niasie ŭ sabie pahrozu poŭnaha razvału redakcyjnaha kalektyvu, što nia tolki nehatyŭna adabjecca na jakaści hazety, ale i moža pryvieści ŭrešcie da prypynieńnia jaje vypusku. Adkaznaść za heta budzie lažać na kiraŭniku redakcyi i zasnavalniku hazety «Biełorusy i rynok» — ZAT «Medyjarynak», kali akcyjanery nia zrobiać zachadaŭ pa adnaŭleńni narmalnaj pracy redakcyjnaha kalektyvu», — havorycca ŭ zvarocie.
Zvarot da akcyjaneraŭ byŭ pryniaty na schodzie pracoŭnaha kalektyvu 26 sakavika.
Zvolniać ci zvolniacca?
Za dva dni da hetaha na staroncy «Biełorusy i rynok» u Facebook byŭ apublikavany adkryty zvarot supracoŭnikaŭ vydańnia da samoj Valanciny Vieštart, u jakim prapanoŭvałasia skaracić štat vydańnia za košt vaśmi aŭtaraŭ. Siarod ich — namieśnica hałoŭnaha redaktaraIryna Kryłovič, adkazny sakratar Jury Siezień, zahadčyk adździełu palityki Paŭluk Bykoŭski, finansavy ahladalnik Uładzimier Tarasaŭ, ahladalnik i publicyst Kanstancin Skuratovič dy inšyja. Jak adznačałasia ŭ zvarocie, hety krok byŭ zrobleny ŭ metach «abarony rabotnikaŭ ad nieabhruntavanych spahnańniaŭ i zvalnieńniaŭ» z pryčyny planavanaha skaračeńnia štatu supracoŭnikaŭ. Na dumku žurnalistaŭ, u dadzieny momant Vieštart specyjalna vyciskaje supracoŭnikaŭ z kalektyvu, kab paźbiehnuć vypłaty vychadnych dapamoh, jakija im naležacca pavodle zakanadaŭstva pry skaračeńni štatu.
Miž tym, jak stała viadoma Radyjo Svaboda, 26 sakavika na schodzie kalektyvu Vieštart abviaściła, što nichto z tych, chto padpisaŭ hetuju zajavu, nie padpadaje pad plany kiraŭnictva pa skaračeńni štatu, tamu jany mohuć zvolnicca tolki sami.
Zrešty, bolšaść žurnalistaŭ hazety «Biełorusy i rynok» zajaŭlajuć: kali sytuacyja ŭ hazecie nia źmienicca, u samy bližejšy čas jany planujuć napisać zajavu ab zvalnieńni pa ŭłasnym žadańni.
Siońniašni kryzis hazety «Biełorusy i rynok» byŭ vyklikany źmienaj składu akcyjaneraŭ ZAT «Medyjarynak», jakoje vystupaje zasnavalnikam štotydniovika «Biełorusy i rynok«.Stvaralnik, raspracoŭnik kancepcyi i hałoŭny redaktar Viačasłaŭ Chadasoŭski, jaki kiravaŭ hazetaj na praciahu ŭsich 25 hadoŭ isnavańnia, pradaŭ bolšuju častku svaich akcyjaŭ niekalkim pryvatnym asobam, u liku jakich — hieneralny dyrektar «Eŭraradyjo»Źmicier Novikaŭ. Novyja akcyjanery pryznačyli novaha hałoŭnaha redaktara — byłuju redaktarku časopisa «Biełorusskoje sielskoje choziajstvo» Valancinu Vieštart. Sam Viačasłaŭ Chadasoŭski atrymaŭ symbaličnuju pasadu šef-redaktara.
Novaja hałoŭnaja redaktarka Valancina Vieštart adrazu abviaściła pra pierafarmatavańnie vydańnia — u pryvatnaści, pra admovu ad palityčnych tem i skasavańnie adpaviednaha adździełu, a taksama ŭviadzieńnie inšych padychodaŭ da pracy, z čym žurnalisty hazety pryncypova nia zhodnyja.
Novy redaktar: svaboda — heta nie ŭsiodazvolenaść
Na schodzie kalektyvu «Biełorusy i rynok» 26 sakavika supracoŭniki taksama prahałasavali za novy prajekt redakcyjnaj palityki. Jon mała adroźnivajecca ad raniejšych pryncypaŭ pracy vydańnia: hazeta, jak i raniej, padkreślivaje svaju prychilnaść da pryncypaŭ liberalnaj demakratyi, rynkavaj ekanomiki, svabody słova i h. d.
Prajekt byŭ raspracavany Kryłovič i Chadasoŭskim — siabrami redakcyjnaj kamisii, stvoranaj pry pasiarednictvie BAŽ. Adnak Vieštart — staršynia hetaj kamisii — adznačyła, što kateharyčna suprać niekatorych pałažeńniaŭ, jakija deklarujucca ŭ prapanavanym varyjancie redakcyjnaj palityki.
«Nia moža być taho, što vy nazyvajecie aŭtarskaj žurnalistykaj, kali žurnalist sam ličyć siabie mesijaj i daje sabie prava mierkavać pra ŭsio, što adbyvajecca. Svaboda — heta nie ŭsiodazvolenaść. Žurnalist — heta čałaviek, jaki źbiraje infarmacyju i pieradaje jaje čytaču. Čamu toj fakt, što čałaviek atrymaŭ dyplom žurnalista, daje jamu prava ličyć siabie specyjalistam va ŭsich halinach i vykazvać svajo mierkavańnie ź luboj nahody? U toj kancepcyi redakcyjnaj palityki, jakuju chočuć bačyć zasnavalniki — nia budzie ŭsiodazvolenaści», — zajaviła Vieštart kalektyvu na ŭčarašnim schodzie.
Prajekt redakcyjnaj palityki nakiravany na razhlad akcyjaneram ZAT «Medyjarynak». Jak padkreśliła Vieštart, razmaŭlajučy z kalektyvam, mienavita akcyjanery buduć prymać kančatkovaje rašeńnie.
«Ja tolki chaču, kab vy razumieli ŭsie — ja taksama najmany rabotnik u dadzienaj sytuacyi, i ja na pryniaćcie redakcyjnaj palityki nijak nie ŭpłyvaju. Ludzi kupili aktyŭ, uładalniki — heta pryvatnyja asoby. Jany kupili pradpryjemstva, i lahična, što jany majuć prava vyznačać stratehiju jaho raźvićcia. Jany biznes chočuć rabić. Jany pakul układvajuć svaje ŭłasnyja hrošy, unosiać ich na rachunak pradpryjemstva. Zrazumiejcie, ludzi chočuć rabić biznes. Heta tolki biznes», — zajaviła jana.
Zvarot kalektyvu redakcyi i prajekt redakcyjnaj palityki majuć razhledzieć na schodzie akcyjaneraŭ ZAT «Medyjarynak» na nastupnym tydni.
«Heta moža vielmi drenna skončycca»
Radyjo Svaboda paprasiła prakamentavać sytuacyju ŭ hazecie «Biełorusy i rynok» žurnalistku tydniovika, kiraŭnicu adździełu pryvatyzacyi Tacianu Manionak. Žurnalistka zajaviła Svabodzie, što sytuacyja ŭ hazecie skłałasia krytyčnaja.
«Mnie zdajecca, što kalektyŭ zrabiŭ usio mahčymaje dla taho, kab usio ž taki adstajać hazetu, bo my viedajem, što jana patrebnaja čytačam. My pamiatajem, kali hod nazad finansavaja sytuacyja ŭ hazecie była składanaja, čytačy nas padtrymlivali i navat prapanoŭvali dapamahčy hrašyma, bo kazali: kali vy sydziecie, to chto zastaniecca? Kalektyŭ pracavaŭ stolki hadoŭ, i ciapier złamać našu kancepcyju… My ličym, što heta aznačaje, što pieršaje biełaruskaje ekanamičnaje vydańnie budzie źniščana. Mnie navat ciažka znajści niejkija arhumenty, čamu tak adbyvajecca, čamu akcyjaner nia vieryć kalektyvu, prafesijanałam u žurnalistycy, jakija prapracavali šmat hadoŭ, čamu była zroblenaja staŭka na čałavieka, mnie zdajecca, vypadkovaha, u jakoha niama adčuvańnia hazety, jaje sutnaści, jaje vahi dla čytačoŭ. Kali b hety akcyjaner choć kryšačku razumieŭ, što heta za vydańnie, usio možna było b papravić. Bo prablema ŭźnikła na pustym miescy. Kalektyŭ hazety vydatna razumieje, što patrebny źmieny, treba chutka raźvivać internet-versiju hazety. Ale ž heta nia značyć, što treba całkam źmianiać kancepcyju. Tym bolš što my nie razumiejem, što heta daść u vyniku. Na žal, heta moža vielmi drenna skončycca».
Manionak nie vyklučaje, što ŭ nastupny paniadziełak, paśla schodu akcyjaneraŭ, kali novyja ŭładalniki hazety nia pojduć nasustrač kalektyvu, supracoŭniki padaduć zajavy ab zvalnieńni.
«My chočam spadziavacca, što akcyjaner zrazumieje, što nia treba ničoha inšaha, akramia taho jak pryznačyć kiraŭnikom hetaj hazety prafesijanała», — zajaviła Manionak.
