Pomnik ustalujuć na pastamiencie la Błahavieščanskaj carkvy na bierazie Dźviny.
Pra heta 26 sakavika paviedamiŭ staršynia Viciebskaha harvykankama Viktar Nikałajkin, pieradaje BiełTA.
Błahavieščanskaja carkva, fotobel.by
«Viaducca raboty pa ŭźviadzieńni pomnika pałkavodcu i kniaziu Alaksandru Nieŭskamu. Kali nie ŭ hetym, to ŭ nastupnym hodzie pomnik abaviazkova źjavicca ŭ Viciebsku i stanie jašče adnoj turystyčnaj słavutaściu», — skazaŭ čynoŭnik.
Jašče ŭ 2009 hodzie Viciebski harvykankam i Viciebskaja pravasłaŭnaja jeparchija abjavili i praviali konkurs mastackich prajektaŭ pa stvareńni pomnika «śviatomu błahaviernamu kniaziu Alaksandru Nieŭskamu». U tym ža hodzie adbylisia i jašče dva konkursy — prajektaŭ pomnika kniahini Volzie, jakaja, pavodle nie paćvierdžanaj navukoŭcami lehiendy, zasnavała Viciebsk, i pomnika vialikamu kniaziu litoŭskamu Alhierdu, padčas kiravańnia jakoha siaredniaviečny Viciebsk dasiahnuŭ najbolšaha roskvitu. Usie try pomniki harvykankam źbiraŭsia ŭstalavać jašče letam 2010 hoda.
Što ž tyčycca astatnich dvuch manumientaŭ, to najbolš skieptyčna viciablanie pastavilisia jak raz da imknieńnia ŭładaŭ ušanavać u horadzie pamiać pra Alaksandra Nieŭskaha, jakoha ŭ Rasii ličać svaim nacyjanalnym hierojem i jaki da Viciebska maje tolki vielmi ŭskosnaje dačynieńnie — ŭ 1239 hodzie jon ažaniŭsia z dačkoj Bračysłava Vasilkaviča, u toj momant kniazia Połackaha, a za niekalki hadoŭ da hetaha kniazia Viciebskaha.