Za zabojstva dvuch čałaviek (adnaho ź ich — zaviedama sastarełaha, druhoha — z asablivaj žorstkaściu) 38-hadovy raniej nieadnarazova sudzimy žychar Rečyckaha rajona pryhavorany da pažyćciovaha źniavoleńnia.
Homielski abłasny sud vynies pryhavor na vyjaznym pasiadžeńni ŭ Rečycy 27 sakavika, vierdykt pakul nie nabyŭ moc i moža być abskardžany. Abvinavačvanamu taksama stavicca ŭ vinu kradziež i ździek z trupa. Pavodle pryhavoru suda abvinavačvany pavinien vypłacić paciarpiełym sumarna 150 młn. rubloŭ, a taksama prajści prymusovaje lačeńnie ad ałkahalizmu.
Jak raniej paviedamlałasia, žychar vioski Biazujeŭ Rečyckaha rajona zabiŭ dvuch adnaviaskoŭcaŭ: 74-hadovuju žančynu i 40-hadovaha mužčynu. 8 maja 2014 hoda ŭ Rečycki RAUS źviarnułasia žančyna z zajavaj ab prapažy brata, žychara Biazujeva. Mužčyna žyŭ adzin. Śledča-apieratyŭnaja hrupa ahledzieła dom i dvor źnikłaha, ale nie vyjaviła nijakich śladoŭ. Pry adpracoŭcy koła znosin mužčyny apieratyŭniki naviedali jaho adnaviaskoŭca 1976 hoda naradžeńnia. U domie apošniaha byli vyjaŭlenyja ślady kryvi, i mužčyna pryznaŭsia ŭ zabojstvie. Pavodle jaho słoŭ, jašče 2 maja jany razam raśpivali śpirtnyja napoi i pasvarylisia. Jon zabiŭ pryjaciela, a trup schavaŭ u kamorcy. Praź niekalki dzion cieła achviary abvinavačvany pieravioz nočču na viełasipiedzie na sielskija mohiłki, dzie paźniej chacieŭ pachavać, ale nie paśpieŭ.
Užo paśla zatrymańnia viaskoviec pryznaŭsia, što ŭ krasaviku 2014 hoda zabiŭ susiedku-piensijanierku. Z žančynaj jon pasvaryŭsia i ŭdaryŭ jaje palenam pa hałavie niekalki razoŭ. Jaje trup jon vyviez na zvałku, dzie vykinuŭ u jar z vadoj. Raniej abvinavačvany byŭ sudzimy, u tym liku za pryčynieńnie śmierci pa nieaściarožnaści.
U svaim apošnim słovie abvinavačvany, źviartajučysia da svaich rodnych i svajakoŭ achviar, a taksama adnaviaskoŭcaŭ, jakija prysutničali ŭ zale suda, skazaŭ: «Ja prašu prabačeńnia va ŭsich. My ŭsie žyli ŭ adnoj vioscy, u nas usio było narmalna, heta nie było zadumana, zapłanavana, ja nie viedaju, adkul heta biarecca. Uspomnicie, jak hučyć malitva: «…i prabač, Boža, hrachi našy, jak i my prabačajem daŭžnikam našym». Usie my ludzi, i ja čałaviek, jaki nie niebiaśpiečny. Ja amal hod u hetaj turmie, viedajecie, što ja pieražyŭ za hety čas? Lepš by mianie zabili».
Prakuror adździeła prakuratury Homielskaj vobłaści Eduard Miadźviedzieŭ, jaki vystupaŭ na pracesie dziaržabvinavaŭcam, padkreśliŭ, što vyniesieny pryhavor adpaviadaje ŭčynienamu złačynstvu i zapytanamu prakuraturaj pakarańniu.
