Mitrapalit Jekaciarynburhski i Vierchaturski Kirył časova zabaraniŭ u słužeńni kliryka chrama Śviaciciela Inakiencija ŭ Jekaciarynburhu za zaklik da viernikaŭ adpraŭlacca na vajnu ŭ Łuhanskuju vobłaść Ukrainy «bić fašysckuju poskudź».
«11 sakavika hetaha hoda kliryk chrama ŭ imia śviaciciela Inakiencija, mitrapalita Maskoŭskaha, h. Jekaciarynburha protaijerej Uładzimir Zajcaŭ, ustupiŭšy ŭ supiarečnaść z pazicyjaj Ruskaj Pravasłaŭnaj Carkvy na toje, što adbyvajecca va Ukrainie, samačynna publična vystupiŭ z zaklikam adpravicca ŭ Łuhanskuju vobłaść z metaj «bić fašysckuju poskudź», — paviedamlajecca na sajcie Jekaciarynburhskaj jeparchii.
Eparchijalnaja rada pryznała asabistaje mierkavańnie protaijereja Uładzimira Zajcava «nie adpaviednym pastyrskamu abaviazku, jaki staić pierad śviatarom Ruskaj Pravasłaŭnaj Carkvy» i pryniała rašeńnie da śviata Vialikadnia (12 krasavika) adchilić śviatara ad słužeńnia ŭ chramie Śviaciciela Inakiencija, «dabrasłaviŭšy jamu znachodžańnie ŭ manastyry śviatych Carskich pakutnikaŭ».
«Pakolki jarkija i palityčna afarbavanyja vykazvańni protaijereja Uładzimira Zajcava mohuć być rascenienyja jak dabrasłavieńnie Carkvy na viadzieńnie bratazabojčaj vajny, što nie adpaviadaje čakańniam usich viernikaŭ dziaciej Ruskaj Pravasłaŭnaj Carkvy, jakija na kožnaj Boskaj liturhii zaklikajuć mir na Ukrainskuju ziamlu», — havorycca ŭ rašeńni jeparchijalnaha savieta.
Va ŭkazie archireja havorycca, što pytańnie ab dalejšym słužeńni kliryka budzie razhledžana paśla Vialikadnia, «hledziačy pa pładach pakajańnia» vinavataha śviatara.
Čytajcie taksama: Sa śviatarom i tancam vajny: u Jekaciarynburhu ŭračysta praviali bajcoŭ vajavać u Danbas FOTA, VIDEA
