Ekanamičny sud Minska daŭ pradprymalniku Iharu Łohvinavu rasterminoŭku na dva miesiacy dla pahašeńnia zapazyčanaści, što ŭtvaryłasia paśla rašeńnia suda ab kanfiskacyi bolš čym 960 młn. rubloŭ dachodu pryvatnaha vydavieckaha ŭnitarnaha pradpryjemstva «Łohvinaŭ» i štrafie ŭ 5,4 młn. rubloŭ.

Pasiadžeńnie Ekanamičnaha suda stalicy, na jakim razhladałasia prośba pradprymalnika ab pradastaŭleńni jamu adterminoŭki pa płaciažy, adbyłosia 16 sakavika. Na sudzie Łohvinava pradstaŭlaŭ advakat, bo sam pradprymalnik znachodzicca za miežami Biełarusi.

Ihar Łohvinaŭ paviedamiŭ BiełaPAN, što zhodna z rašeńniem suda na praciahu dvuch miesiacaŭ jon pavinien vypłacić sumu roŭnymi dolami.

Na siońnia z dapamohaj hramadskaści Biełarusi i zamiežža pradprymalniku ŭdałosia sabrać kala 58 tys. z 64 tys. dołaraŭ, nieabchodnych dla poŭnaha pahašeńnia zapazyčanaści.

Adnak pradprymalnik miarkuje, što za toj čas, jaki pradpryjemstvu daŭ sud, astatniuju častku hrošaj udasca sabrać. «Kala pałovy sumy ŭ nas ciapier na rukach», — dadaŭ Łohvinaŭ.

Nahadajem, 9 studzienia ekanamičny sud Minska pastanaviŭ aštrafavać PVUP «Łohvinaŭ» na 30 bazavych vieličyń (5,4 młn. rubloŭ) za ažyćciaŭleńnie niezakonnaj pradprymalnickaj dziejnaści, a taksama kanfiskavać dachod, atrymany jurydyčnaj asobaj u studzieni—śniežni 2014 hoda (bolš za 960 młn. rubloŭ). Pradpryjemstva było vymušana pracavać biez rehistracyi ŭ rejestry raspaŭsiudžvalnikaŭ infarmacyi, bo Ministerstva infarmacyi nieadnarazova ŭ rehistracyi admaŭlała. Łohvinaŭ abskardziŭ rašeńnie ekanamičnaha suda Minska, ale Viarchoŭny sud u zadavalnieńni isku admoviŭ.

Kala tysiačy čałaviek ź Biełarusi i inšych krain achviaravali hrošy vydaviectvu «Łohvinaŭ». Akramia taho, tvorčaja supolnaść Biełarusi i Polščy zapuściła internet-aŭkcyjon auction.savelohvinau.club u padtrymku pradpryjemstva «Łohvinaŭ», na jaki svaje raboty vystavili mnohija biełaruskija mastaki. Srodki, vyručanyja ad prodažu łotaŭ, pieraličvalisia niepasredna na dabračynny rachunak pradpryjemstva. Taksama niekatoryja biełaruskija piśmieńniki praviali sustrečy z čytačami, u miežach jakich taksama źbiralisia srodki ŭ padtrymku «Łohvinava».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?