Sudovaja kalehija pa kryminalnych spravach Bresckaha abłasnoha suda 16 sakavika vyniesła pryhavor 20-hadovaj brestaŭčancy, jakaja źbiła da śmierci piacimiesiačnaha syna.
Jak paviedamiła načalnik adździeła prakuratury Bresckaj vobłaści Alena Leščanka, jakaja padtrymlivała dziaržaŭnaje abvinavačańnie pa spravie, nočču 22 listapada 2014 hoda ŭ Breście žančyna, budučy ŭ stanie ałkaholnaha apjanieńnia, u kvatery pa miescy žycharstva źbiła svajo piacimiesiačnaje dzicia. U hety čas jana była z synam adna. Muž žančyny byŭ na pracy.
Pavodle słoŭ Leščanki, abvinavačvanaja padčas sudovaha pasiadžeńnia pakazała, što napiaredadni viečaram, paśla taho jak muž pajšoŭ na pracu, da jaje prychodziła jaje maci. Razam jany vypili dźvie butelki harełki. Kali babula dziciaci pajšła, chłopčyk pačaŭ płakać.
Spačatku maci sprabavała supakoić syna, ale toj praciahvaŭ płakać. Tady abvinavačvanaja stała źbivać niemaŭla. Jana naniesła jamu dałońniu ŭdary pa tvary, potym uziała na ruki i kinuła na kanapu: chłopčyk udaryŭsia hałavoj ab draŭlany padłakotnik. Zatym uziała syna za ruku i kinuła z kanapy na łožak. Paśla hetaha spavivała małoha z takoj siłaj, što byŭ čutny chrust jaho kaściej.
Potym maci pakinuła syna, jaki płakaŭ, i lahła spać.
Kala čatyroch ranicy 22 listapada pryjšoŭ dadomu muž žančyny, jakaja ŭ hety čas spała. Spačatku jon pačuŭ stohny syna, potym ubačyŭ, što ŭ dziciaci tvar u siniakach i jano nie trymaje hałavu. Mužčyna vyklikaŭ chutkuju dapamohu.
Pry hetym žonka nie davała vyklikać miedykaŭ, nie raskazała, što zdaryłasia z synam ni mužu, ni rabotnikam chutkaj dapamohi. Ź niemaŭlom u balnicu pajechaŭ baćka, tamu što maci admoviłasia.
Dzicia špitalizavali ŭ Bresckuju abłasnuju dziciačuju balnicu, dzie jano 27 listapada pamierła ŭ reanimacyjnym adździaleńni.
Zhodna z zaklučeńniem sudova-miedycynskaj ekśpiertyzy, piacimiesiačnamu chłopčyku było naniesiena nie mienš jak 28 cialesnych paškodžańniaŭ. U tym liku pierałomy kaściej zvodu čerapu, udar hałaŭnoha mozhu, pierałom pravaj plečavoj kości, zakrytaja tupaja traŭma hrudnoj kletki, udar hrudnoha adździeła śpinnoha mozhu.
Zhodna z pakazańniami na sudovym pasiadžeńni muža žančyny i jaho brata, abvinavačvanaja lubiła vypić, uchilałasia ad dohladu za synam. Byŭ vypadak, kali jana pakinuła dzicia svajakam i viarnułasia za im u stanie ałkaholnaha apjanieńnia. Taksama pajšła z balnicy, dzie lažała z synam, i viarnułasia tudy pjanaj. Raniej jana prysyłała mužu SMS, što źbirajecca ździekavacca nad dziciem.
Sudovaja kalehija pa kryminalnych spravach Bresckaha abłasnoha suda pryznała žančynu vinavataj va ŭčynieńni złačynstva, praduhledžanaha p. 2, p. 6 č. 2 art. 139 KK (zabojstva zaviedama małaletniaha, jaki znachodziŭsia ŭ biezdapamožnym stanie, učynienaje z asablivaj žorstkaściu), i pryhavaryła da 15 hadoŭ pazbaŭleńnia voli ŭ kałonii ahulnaha režymu.
Pa rašeńni suda ź jaje spahnana ŭ jakaści kampiensacyi maralnaha ŭronu na karyść baćki dziciaci 100 młn. rubloŭ.
Kompleksnaja psichołaha-psichijatryčnaja ekśpiertyza ŭstanaviła, što žančyna nie pakutuje na jakija-niebudź psichičnyja zachvorvańni i ŭ momant učynieńnia złačynstva ŭ stanie afiektu nie znachodziłasia.
«U sudzie abvinavačvanaja pryznała svaju vinu častkova i zajaŭlała, što nie chacieła śmierci svajho dziciaci», — dapoŭniła Leščanka.
Raniej žančyna nie była sudzimaja. U muža i žonki heta było adzinaje dzicia.
Pryhavor nie nabyŭ zakonnuju moc i moža być abskardžany.
